اننت ناگ: خراب موسمی صورتحال کو دیکھتے ہوئے حکام نے امرناتھ یاتریوں کے لئے ایڈوائزری جاری کی ہے، جس کے تحت کسی بھی یاتری کو پہلگام کے نُنون بیس کیمپ سے شری امرناتھ گھپا کی طرف جانے کی فی الحال اجازت نہیں دی جارہی ہے۔
متعلقہ حکام کے مطابق خراب موسمی حالات کے پیش نظر امرناتھ یاترا کو عارضی طور پر روک دیا گیا ہے کیونکہ شدید بارشوں کی وجہ سے موسمی صورتحال کافی خراب ہے، اسلئےاننت ناگ ضلع کے پہلگام علاقے میں نُنون بیس کیمپ سے یاتریوں کو گھپا کی اور روانہ ہونے کی اجازت نہیں دی جا رہی، تاکہ یاتریوں کی حفاظت کو ممکن بنایا جا سکے۔
ایک سرکاری افسر نے ای ٹی وی بھارت کو جانکاری دیتے ہوئے کہا کہ موسم کی خراب صورتحال کے پیش نظر یاترا کو فی الحال وقتی طور پر روک دیا گیا ہے۔جوں ہی موسم بہتر ہوگا تو یاتریوں کو آگے جانے کی اجازت دی جائے گی۔
انہوں نے کہا کہ کسی بھی یاتری کو امرناتھ گھپا کی طرف جانے کی اجازت نہیں دی گئی ہے،اور یاترا مکمل کرنے والے گھپا یا گھپا کے راستے میں موجود کسی بھی یاتری کو واپس لوٹنے کی اجازت نہیں دی گئی، کیونکہ راستے میں موسم کافی خراب ہے ۔ انہوں نے مزید کہا کہ 3 ہزار سے زیادہ یاتری اس وقت نُنون بیس کیمپ میں مقیم ہیں۔
