(سرینگر)جنوبی کشمیر کےضلع شوپیان میں عسکریت پسندوں اور فورسز اہلکاروں کے درمیان تصادم میں دو عسکریت پسند اور ایک فوجی اہلکار سمت تین افراد ہلاک جبکہ دو فوجی اہلکار زخمی ہوئے ہیں۔ابتدائی اطلاعات کے مطابق فورسز اہلکاروں نے درگڈ گاؤں کو محاصرے میں لیا ہے جو زینہ پورہ پولیس تھانے کے علاقے میں واقع ہے۔ ہلاک ہوئے عسکریت پسندوں کی شناخت ابھی تک نہیں ہوئی ہے۔اس گاؤں میں ماضی میں ایک خونیں تصادم ہوا تھا جس میں متعدد عسکریت پسند اور سیکیورٹی اہلکار ہلاک ہوئے تھے۔پولیس ذرائع کے مطابق فورسز نے عسکریت پسندوں کی موجودگی کی اطلاع پاکر علاقے کو محاصرے میں لیا۔واضح رہے شوپیان، کشمیر کے ان حساس اضلاع میں شامل ہے جہاں عسکریت پسند کافی تعداد میں موجود رہے ہیں۔ اس ضلع میں بڑی تعداد میں پرتشدد واقعات رونما ہوئے ہیں تاہم فورسز حکام کا دعویٰ ہے کہ حالیہ مہینوں کے دوران متعدد عسکریت پسندوں کو ہلاک کرکے ان کا زور توڑ دیا گیا ہے۔
