(سرینگر) جموں و کشمیر کے سرکاری اسکولوں میں بائیومیٹرک حاضری نظام لگایا جارہا ہے تاکہ اسکولوں سے غیر اعلانیہ اور بغیر عرضی کے غائب رہنے والے اساتذہ کو جواب دہ بنایا جائے۔ دور دراز علاقوں میں قائم سرکاری اسکولوں میں اس سے اساتذہ کے غائب رہنے پر روک اور انہیں جوابدہ بنانے میں مدد ملے گی۔ جانکار ذرائع کے مطابق حکومت بغیر چھٹی کے ڈیوٹی سے غیر حاضر رہنے اور تاخیر سے اسکول پہنچنے والے سرکاری اساتذہ کے خلاف کریک ڈاؤن کرنے کی تیاری کر رہی ہے تاکہ اسکولوں میں تعلیم کے معیار کو بہتر بنانے کے لیے ایک حقیقی وقت کی نگرانی کا نظام بن سکے۔ واضح رہے اس وقت سرکاری اسکولوں میں اساتذہ کی حاضری رجسٹر میں ہوتی ہے جس کی وجہ سے اساتذہ کی حقیقی معنوں میں مانیٹرنگ نہ ہو رہی ہے۔ اس ضمن میں اسکولوں میں بڑھتا ہوا ڈراپ آؤٹ رحجان اساتذہ کی عدم دلچسپی کا منہ بولتا ثبوت ہے۔ چیف سکریٹری ارون کمار مہتا نے محکمہ سے کہا ہے کہ وہ تمام اسکولوں میں ترجیحی بنیادوں پر بائیو میٹرک سسٹم نصب کرے تاکہ اساتذہ کی حاضری پر نظر رکھی جائے اور بغیر اجازت چھٹی کے ڈیوٹی سے غیر حاضر رہنے والے اساتذہ کے خلاف محکمانہ کارروائی کی جائے۔ محکمہ اسکول ایجوکیشن کے ایک اعلیٰ افسر نے بتایا کہ محکمہ اسکولوں میں بائیو میٹرک سسٹم لگانے کی تیاری کر رہا ہے اور یہ عمل مارچ تک مکمل کر لیا جائے گا۔
