شمالی کشمیر میں کچھ ہی غیر مقامی جنگجو سرگرم، بانڈی پورہ حملے سے متعلق اہم سراغ ہاتھ لگے ہیں

(بانڈی پورہ) شمالی کشمیر میں کچھ ہی غیر مقامی جنگجو سرگرم ہے، کی بات کرتے ہوئے جموں و کشمیر پولیس سربراہ دلباغ سنگھ نے کہا کہ بانڈی پورہ میں جنگجویانہ حملے کے بارے میں پولیس کو کچھ اہم سراغ ملے ہیں۔ اسی دوران لائن آف کنٹرول پر دراندازی کی کوشش کو ناکام بنانے کیلئے حکمت عملی مرتب دی جا رہی ہے، کی بات کرتے ہوئے پولیس سربراہ نے کہا کہ پاکستان منشیات کے استعمال سے جموں و کشمیر کے نوجوانوں کو تباہ کر رہا ہے۔ گلشن چوک بانڈی پورہ میں جنگجویانہ حملے میں ہلاک ہوئے دو پولیس اہلکاروں کے لواحقین سے تعزیت پرسی کیلئے دلباغ سنگھ نے سوپور میں میڈیا سے بات کرتے ہوئے بتایا کہ گلشن چوک بانڈی پورہ میں پولیس پارٹی پر حملے میں ملوث جنگجوﺅں کی شناخت کر لی گئی ہے اور پولیس کے ہاتھ اس حملے سے متعلق انتہائی اہم سراغ لگے ہیں۔ شمالی کشمیر میں غیر مقامی جنگجوﺅں کی تعداد کے بارے میں پوچھے گئے ایک سوال کے جواب میں پولیس سربراہ نے کہا کہ شمالی کشمیر میں غیر مقامی جنگجوﺅں کی تعداد زیادہ نہیں ہے کیونکہ پولیس ان پر نظر گزر رکھی ہوئی ہے۔ انہوں نے کہا کہ کچھ ہی جنگجوﺅں نے حالیہ میں دراندازی کرکے اس پار داخل ہونے میں کامیابی حاصل کر لی ہے اور ان کو ڈھونڈ نکالنے کیلئے کارروائی جاری ہے۔ ادھر دورہ راجوری اور پونچھ کے دوران سیکورٹی انتظامات کا جائزہ لینے کے بعد دلباغ سنگھ نے ایک مشترکہ سیکورٹی میٹنگ کی صدارت کی جس دوران انہوں نے دونوں اضلاع میں سیکورٹی صورتحال کا جائزہ لیا۔ اس موقعہ پر انہوں نے کہا کہ لائن آف کنٹرول پر دراندازی کی کوششوں کو ناکام بنانے کیلئے حکمت عملی مرتب دی جا رہی ہے تاکہ اُس پا ر سے ہونے والی کسی بھی کوشش کو کامیاب نہ ہونے دیا جائے۔ انہوں نے کہا کہ پونچھ اور راجوری میں درندازی کی کوششیں کئی بار ریکارڈ کی گئی ہے جن کو ناکام بنایا گیا۔ انہوں نے کہا کہ سرحدوں پر فوج چوکس ہے اور پاکستان کی جانب سے جو بھی کوششیں کی جا رہی ہے ان کو بروقت ناکام بنایا جاتا ہے۔ دلباغ سنگھ نے مزید کہا کہ پاکستان جموں و کشمیر کے نوجوانوں کو منشیات کا عادی بنا کر انہیں تباہ و برباد کر رہا ہے جبکہ پاکستانی ایجنسیاں منشیات، اسلحہ اور نقدی کی سمگلنگ کرکے جموں و کشمیر میں عسکری کارروائیوں کو بڑھاﺅا دیتا ہے۔ اس موقعہ پر میٹنگ میں حالیہ دراندازی کے واقعات کے بارے میں جانکاری حاصل کر لی گئی اور سیکورٹی فورسز کو ہدایت دی گئی ہے کہ وہ پاکستان کی جانب سے ہونی والی کسی بھی کوشش کو ناکام بنانے کیلئے ہمیشہ متحرک رہے۔ انہوں نے مزید کہا کہ مغل روڑ پر مزید چیک پوائنٹ قائم کیے جائیں تاکہ اسلحہ اور منشیات کی اسمگلنگ کرنے کی کوششوں پر روک تھام لگائی جائے اور ایسی کارروائیوں پر نظر رکھی جائے ۔