(سرینگر) جموں و کشمیر میں زمین کے قانونی مالکان کو اپنی نوعیت کا پہلا اراضی پاس بک اُردو، انگریزی اور ہندی زبانوں میں کیا جائے گا۔ معلومات اور ریونیو ریکارڈ تک لوگوں کی آسان رسائی کو فروغ دینے کے اِقدام کے طور چیف سیکریٹری ڈاکٹر ارون کمار مہتا نے محکمہ ریونیو کو ہدایت دی کہ وہ تین زبانی اراضی پاس بک تیارکرے۔ چیف سیکرٹری ڈاکٹر ارون کمار نے ریونیو ڈیپارٹمنٹ کے عوامی معاملات میں شفافیت کو مزید فروغ دینے کے لئے اِصلاحات کے طور پر محکمہ کو ہدایت دی ہے کہ وہ لوگوں کو ریونیو پاس بک جاری کرنے کا ایک طریقہ کار تیار کرے جس میں ایک ماہ کے اندر ان کی تمام قانونی اراضی کے بارے میں معلومات ہوں تاکہ 26؍ جنوری 2022ء کو باضابطہ اجرأ کیا جاسکے۔ جموں اور سرینگر کے اضلاع میں 31 ؍مارچ 2022 تک اور دیگر تمام اَضلاع میں 15 ؍اگست 2022 ء تک یہ عمل مکمل کیا جائے گا۔ خدمات کی فراہمی کو بہتر بنانے کی خاطر مزید اِقدامات کے طور پر، تمام عمل کو ڈیجیٹائز کیا جائے گا۔
