(سرینگر) حالیہ بھاری بر باری کے بعد وادی کشمیر ٹھٹھرتی سردی کی لپیٹ میں ہے جس نے لوگوں کا جینا دو بھر کر کے رکھ دیا ہے۔ ادھر محکمہ موسمیات کی پیش گوئی کے مطابق وادی میں 16 جنوری تک موسم مجموعی طور پر خشک رہنے کا امکان ہے۔ انہوں نے کہا کہ اس دوران اگرچہ دن کے درجہ حرارت میں بہتری واقع ہوگی تاہم رات کے کم سے کم درجہ حرارت میں بتدریج گراوٹ درج ہونے کا ہی امکان ہے۔ سرینگر میں کم سے کم درجہ حرارت0.2 ڈگری سینٹی گریڈ ریکارڈ کیا گیا جہاں گذشتہ شب بھی یہی درجہ حرارت ریکارڈ ہوا تھا۔ گلمرگ جہاں قریب تین فٹ تازہ برف جمع ہے، میں کم سے کم درجہ حرارت منفی10.6 ڈگری سینٹی گریڈ ریکارڈ کیا گیا جو گذشتہ شب منفی10.0 ڈگری سینٹی گریڈ ریکارڈ ہوا تھا۔ پہلگام میں کم سے کم درجہ حرارت منفی10.4 ڈگری سینٹی گریڈ ریکارڈ کیا گیا جہاں گذشتہ شب کم سے کم درجہ حرارت منفی2.5 ڈگری سینٹی گریڈ ریکارڈ ہوا تھا۔ لداخ کے قصبہ دراس میں کم سے کم درجہ حرارت منفی 24.2 ڈگری سینٹی گریڈ ریکارڈ کیا گیا جبکہ ضلع لیہہ میں کم سے کم درجہ حرارت منفی 12.9 ڈگری سینٹی گریڈ اور ضلع کرگل میں کم سے کم درجہ حرارت منفی11.3 ڈگری سینٹی گریڈ ریکارڈ کیا گیا۔ دریں اثنا وادی میں منگل کے روز بھی موسم خشک مگر ابر آلود رہا تاہم آفتاب نے بھی بادلوں کے اوٹ سے باہر نکلنے کی کئی کامیاب کوششیں کیں۔
