(سرینگر) پولیس نے بانڈی پورہ ضلع میں لشکر طیبہ سے وابستہ تین معاونین کو حراست میں لینے کا دعویٰ کیا ہے۔پولیس نے بتایا کہ بانڈی پورہ قصبہ اور اُس کے ملحقہ علاقوں میں ملی ٹینٹ معاونین کی نقل وحرکت کی اطلاع موصول ہونے کے بعد 26آر آر، 3بٹالین سی آر پی ایف اور پولیس نے مشترکہ آپریشن طور پر آپریشن شروع کیا جس دوران تین اعانت کاروں کو حراست میں لے کر اُن کے قبضے سے قابل اعتراض مواد برآمد کرکے ضبط کیا گیا ہے. پولیس نے گرفتارشدگان کی شناخت غلام محمد ، ارشاد حسین ساکنان اشٹنگو بانڈی پورہ اور عاشق حسن ساکن سوپور کے بطور کی ہے۔ پولیس نے کہاکہ ابتدائی تحقیقات کے دوران معلوم ہوا ہے کہ مذکورہ اعانت کار ضلع میں سرگرم جنگجووں کو منطقی مدد فراہم کر رہے تھے۔پولیس کے مطابق گرفتار اعانت کاروں کے قبضے سے اسلحہ و گولہ بارود اور دوسرا قا بل اعتراض مواد برآمد کرکے ضبط کیا گیا۔پولیس نے اس ضمن میں کیس درج کرکے مزید تحقیقات شروع کی ہے۔
