چکِ نوگام شوپیان تصادم: مشتبہ عسکریت پسند علاقے سے نکلنے میں کامیاب، فورسز آپریشن ختم

(شوپیان) چک نوگام شوپیان میں بدھ کی شام ایک خونریز معرکہ آرائی شروع ہوئی جس میں رات دیر گئے تک 3فوجی اہلکار شدید طور پر زخمی ہوئے جبکہ ملی ٹینٹ محصور تھے۔پولیس کے آفیشل ٹویٹر اکونٹ پر اطلاع دی گئی کہ چک نوگام نامی گائوں میں ملی ٹینٹوں کی موجودگی کے بعد محاصرے کے دوران مسلح جھڑپ شروع ہوئی۔پولیس ذرائع نے بتایا کہ انہیں گائوں میں کم سے کم 2ملی ٹینٹوں کی موجودگی کی اطلاع ملی جس کے بعد شام 7بجے 34آر آر، 14بٹالین سی آر پی ایف اور پولیس ٹاسک فورس شوپیان نے مشترکہ طور پر محاصرہ کیا، لیکن اندھیرے کا فائدہ اٹھا کر عسکریت پسند علاقے سے نکلنے میں کامیاب ہو گئے۔ذرائع کا کہنا ہے کہ جونہی ایک مشتبہ جگہ کی طرف فورسز کی ایک پارٹی پیش قدمی کررہی تھی تو ملی ٹینٹوں نے اچانک فورسز پر حملہ کردیا اور اندھا دھند فائرنگ شروع کی۔ذرائع کا کہنا ہے کہ شام دیر گئے 7بجکر 25منٹ پر فائرنگ ہوئی جس کے بعد مکمل طور پر خاموشی چھا گئی۔ملی ٹینٹوں کی ابتدائی فائرنگ سے آرمی کے 3اہلکار شدید زخمی ہوئے جنکی شناخت گنر سوم ویر کمار،لانس نائیک مائنک سنگھ اور لانس نائیک سنیل کمار کے بطور ہوئی ہے، جنہیں فوری طور پر سرینگر کے آرمی اسپتال میں منتقل کردیا گیا ہے. گاؤں کے چاروں طرف فورسز نے جنریٹرلگاکر روشنی کا انتظام کر لیا اور آپریشن کو وسیع کر کے ملی ٹینٹوں کو ڈھونڈ نکالنے کی کارروائی شروع کردی ہے۔مقامی لوگوں نے بتایا کہ شام ساڑھے 7بجے کے بعد گاؤں میں کوئی فائرنگ نہیں ہوئی البتہ خوف و ہراس کی صورتحال تھی۔