(سرینگر) 270 کلومیٹر طویل سرینگر۔جموں قومی شاہراہ پر جمعرات کے روز پنتھال کے مقام پر چٹانیں کھسکنے کی وجہ سے ٹریفک کی نقل وحمل معطل رہی۔ اطلاعات کے مطابق شاہراہ پر جمعرات کی صبح کو پنتھال کے مقام پر بھاری برکم پتھر نیچے گر آئے جس کے نتیجے میں شاہراہ پر ٹریفک کی آمدورفت کو روک دیا گیا ہے، اس دوران متعلقہ ایجنسیوں نے شاہراہ کو قابل آمدورفت بنانے کے لئے مشینری اور نفری کو کام پر لگا دیا ہے ۔ بتایا جاتا ہے کہ متعلقہ ایجنسیوں کی طرف سے گرین سگنل موصول ہونے کے بعد ہی شاہراہ کو کھول دیا جائے گا۔ دریں اثنا ٹریفک حکام نے بانہال، سیری ، رام بن اور ناشری میں ٹریفک کو روک دیا ہے۔ ٹریفک حکام کا کہنا ہے کہ کام شدو مد سے جاری ہے اور شام تک شاہراہ کو قابل آمدورفت بنانے کے بعد ٹریفک کو آگے جانے کی اجازت دی جائے گی۔
