(سرینگر) مرکزی حج کمیٹی نے حج درخواست فارم بھرنے کی تاریخ میں پندرہ روز کی توسیع کردی ہے۔ 31 جنوری حج درخواست فارم بھرنے کی آخری تاریخ تھی، لیکن عازمین حج کو مزید سہولیات فراہم کرنے کیلئے درخواست فارم بھرنے کی آخری تاریخ میں پندرہ روز کی توسیع کردی گئی ہے۔ اب عازمین حج 15 فروری تک درخواست فارم بھر سکتے ہیں۔ بتایا جاتا ہے کہ کووڈ 19 کے سبب عازمین حج کو مختلف پریشانیوں کا سامنا کرنا پڑرہا ہے ۔ متعلقہ حکام کے مطابق حالات کے مدنظر اور عازمین حج کو مزید سہولیات پہچانے کیلئے درخواست فارم بھرنے کی تاریخ میں مزید توسیع کی گئی ہے۔ یاد رہے مرکزی حج کمیٹی کی جانب سے چند روز قبل ہی مرکزی وزارت برائے اقلیتی امور کو ایک مکتوب روانہ کیا گیا تھا ، جس میں تاریخ بڑھانے کی درخواست کی گئی تھی۔ مرکزی حج کمیٹی کی درخواست کو قبول کرتے ہوئے اقلیتی امور کی مرکزی وزارت نے درخواست فارم بھرنے کیلئے پندرہ روز کی توسیع کی ہے۔مرکزی حج کمیٹی کے سی ای او نے بتایا کہ مرکزی حج کمیئی کو ابھی تک 78 ہزار سے زیادہ درخواست فارم موصول ہوچکے ہیں ، ان میں بغیر محرم کے سفر حج پر روانہ ہونے والی 1600 سے زیادہ خواتین نے درخواستیں دی ہیں۔ مرکزی حج کمیٹی کے سی ای او یعقوب شیخ نے ایک سرکولر جاری کرتے ہوئے تمام ریاستی حج کمیٹیوں کو درخواست فارم بھرنے کی تاریخ میں توسیع کے متعلق آگاہ کردیا ہے۔انہوں نے کہا کہ حج درخواست فارم بھرنے کا پورا سسٹم ڈیجیٹل ہوگیا ہے اور ہمیں موبائل ایپ سے بھی بڑی تعداد میں درخواست فارم موصول ہورہے ہیں۔ یعقوب شیخ نے کہاکہ حج 2022 کے متعلق حکومت ہند اور حکومت سعودی عرب کے درمیان دوطرفہ معاہدہ ابھی تک نہیں ہوپایا ہے ، اس کی وجہ سے ہندوستانی عازمین حج کا کوٹہ بھی ابھی تک طے نہیں ہوا ہے۔ ہمیں امید ہے کہ حج 2022 کیلئے دونوں ممالک کے درمیان جلد ہی بائی لیٹرل ایگریمنٹ ہوگا۔
