(جموں) جموں و کشمیر حکومت کو صنعتی یونٹس قائم کرنے کے لیے زمین کی الاٹمنٹ کے لیے 47ہزار 441کروڑ روپے کی سرمایہ کاری کی 4ہزار 226تجاویز موصول ہوئی ہیں۔ واضح رہے جموں و کشمیر انتظامیہ نے گزشتہ سال جنوری میں نئی سرمایہ کاری کی حوصلہ افزائی اور صنعتی ترقی کو بلاک کی سطح تک لے جانے کے لیے 28ہزار400کروڑ روپے کی لاگت کے ساتھ ایک نئی صنعتی ترقیاتی اسکیم کا اعلان کیا تھا. 2037تک لاگو ہونے والی نئی پالیسی نے غیر ملکیوں کے لیے خطے میں سرمایہ کاری کی راہ بھی ہموار کی ہے. ایک سینئر سرکاری افسر کے حوالے سے خبر رساں ادارے پی ٹی آئی کی ایک رپورٹ میں کہا گیا ہے کہ ، "مرکز کے زیر انتظام علاقہ میں صنعتی یونٹس قائم کرنے کے لیے زمین کی الاٹمنٹ کے لیے 47,441 کروڑ روپے کی سرمایہ کاری کے ساتھ 4,226 تجاویز آن لائن موڈ کے ذریعے موصول ہوئی ہیں۔ان تجاویز سے 1.97 لاکھ روزگار پیدا ہونے کا تخمینہ لگایا گیا ہے، عہدیدار نے کہا کہ ان تجاویز کی منظوری کے عمل کو پہلے ہی تیزی سے ٹریک کیا گیا ہے۔عہدیدار نے کہا کہ 2022-23 میں نئی صنعتی املاک کی ترقی کے لیے کل 150کروڑ روپے کا انتظام کیا گیا ہے، اور حکومت کا مقصد نئی پالیسی کے تحت تقریباً 4.5 لاکھ لوگوں کے لیے روزگار پیدا کرنا ہے۔انہوں نے یہ بھی کہا کہ محکمہ صنعت و تجارت کو مختص 1,003کروڑ روپے یوٹی میں صنعتی ترقی کو نئی بلندیوں تک لے جانے کی جاری کوششوں کی تکمیل کریں گے۔جموں و کشمیر میں نئی صنعتی اسٹیٹس کے قیام پر خاطر خواہ رقم خرچ کی جائے گی۔ صنعت کا محکمہ دستکاری کو فروغ دینے کے لیے 2,000 سیلف ہیلپ گروپس کی بھی مدد کرے گا۔یاد رہے کہ اس سال کے بجٹ میں جموں و کشمیر کے نوجوان کاروباریوں کو مالی امداد فراہم کرنے کے لیے 200کروڑ روپے مختص کیے گئے ہیں. (ایجنسیاں)
