(پلوامہ) ضلع پلوامہ کے لاجورہ گاوں میں مشتبہ جنگجووں نے دو غیر مقامی مزدوروں پر فائرنگ کی جس کے نتیجے میں وہ شدید طورپر زخمی ہوئے اور اُنہیں ضلع اسپتال پلوامہ منتقل کیا گیا۔ یاد رہےکہ اتوار کی شام کو پلوامہ کے ہی نوپورہ بالاعلاقے میں فائرنگ کے ایک واقعے میں غیر مقامی ڈرائیور اور کنڈیکٹر شدید طورپر زخمی ہوئے تھے۔ حکام نے بتایا کہ پیر کے روز لاجورہ پلوامہ میں مشتبہ جنگجووں نے دو غیر مزدوروں پر نزدیک سے گولیاں چلائیں جس کے نتیجے میں وہ شدید طورپر زخمی ہوئے ہیں ۔انہوں نے بتایا کہ آس پاس موجود لوگوں نے زخمیوں کو نزدیکی اسپتال منتقل کیا جہاں سے اُنہیں ضلع اسپتال ریفر کیا گیا۔زخمیوں کی شناخت پتلیشور کمار ولد جوکو چودھری اور تھاگ چودھری ساکنان بہار کے بطور ہوئی ہے۔بتایا گیا ہے کہ پتلیشور کمارکے بازو اور تھاگ چودھری کی ٹانگ اور بازو میں گولی پیوست ہوئی ہے اور اُن کی حالت قدرے بہتر ہے۔ دریں اثناء فورسز نے علاقے کومحاصرے میں لے کر حملہ آوروں کی بڑے پیمانے پر تلاش شروع کی ہے۔
