سری نگر//جموں و کشمیر ہائی کورٹ نے حکومت کو ہدایت دی ہے کہ وہ گزشتہ سال 15نومبر میں ایک انکائونٹر میں مارے گئے گول رام بن کے شہری عامر ماگرے کی لاش لواحقین کو سونپے اور اُنہیں 5لاکھ روپے کا معاوضہ دیا جائے۔
یہ فیصلہ جسٹس سنجیو کمار کی بنچ نے مقتول عامر ماگرے کے والد محمد لطیف ماگرے کو ان کے وکیل دیپیکا سنگھ راجاوت، وزارت داخلہ (ایم ایچ اے) حکومت ہند کے ذریعے اپنے اے ایس جی آئی ٹی ایم شمسی اور جموں و کشمیر حکومت کے ایڈیشنل ایڈووکیٹ جنرل آصفہ پدرو کے ذریعے کیس کو سننے کے بعد سامنے آیا ہے۔
تفصیلات کے مطابق عدالت نے آج اپنے فیصلے میں حکومت کو ہدایت دی ہے کہ وہ عامر کی لاش کو نکال کر آخری رسومات کے لیے اس کے اہل خانہ کو سونپے۔ عدالت نے حکومت کو عامر ماگرے کے لواحقین کو 5لاکھ روپے معاوضہ ادا کرنے کا بھی حکم دیا ہے۔
اس سال 12 جنوری کو، عدالت نے ایم ایچ اے اور جموں و کشمیر حکومت کو ایڈوکیٹ راجاوت کی عرضیوں کے بعد جواب دینے کے لیے نوٹس جاری کیا تھا کہ لاش کے حوالے کرنے میں تاخیر سے خاندان کے افراد کو ذہنی طور پر صدمہ پہنچے گا۔ انہوں نے کہا کہ تاخیر طبی طور پر بھی "ممکن” نہیں تھی۔
واضح رہے کہ حیدر پورہ تصادم میں مارے جانے والے دو اور شہری الطاف احمد بھٹ اور ڈاکٹر مدثر گل کو نکالا گیا تھا.
