سری نگر// بارہمولہ ضلع کے قصبہ اوڑی کے بونیار علاقے میں جنگلی جانور نے لگاتار تین دنوں کے دوران تین کمسن بچوں کو اپنا نوالہ بنایا۔
ذرائع کے مطابق اوڑی کے بٹنگی بونیار میں منگل کی صبح ایک جنگلی جانور ایک بارہ سالہ لڑکی کو اٹھاکر نزدیکی جنگل میں لے گیا۔
انہوں نے کہا کہ بچی کے چیخنے چلانے پر اہلخانہ اور مقامی لوگ متوجہ ہوئے اور انہوں نے جانور جو ممکنہ طور پر ایک آدم خورتیندوا ہے، کا تعاقب کیا لیکن جانور بچی کو لے کر گھنے جنگل میں غائب ہوگیا۔
ان کا کہنا تھا کہ مقامی لوگوں کی انتھک کاوشوں کے بعد انہیں بچی کی لاش ہی بر آمد ہوئی۔
متوفی بچی کی شناخت رتبہ منظور دختر منظور احمد بٹ کے بطور ہوئی ہے۔
بتادیں کہ یہ گذشتہ تین دنوں کے دوران اس علاقے میں اس نوعیت کا ہونے والا مسلسل تیسرا واقعہ ہے۔
قبل ازیں کنجن بونیار علاقے سے تعلق رکھنے والا ایک بارہ سالہ لڑکا شاہد احمد ولد عبدالجبار گنائی جو اتوار سے لاپتہ تھا کی لاش پیر کے روز ایک جنگل میں بر آمد کی گئی جبکہ ہفتے کی شب اوڑی کے چھولن کالسی گھاٹی علاقے میں بارہ سالہ عامر احمد ولد منیر احمد کو جنگلی جانور نے اپنا نوالہ بنایا تھا.
