سرینگر / وادی کشمیر میں دگر گواں موسمی صورتحال کے چلتے ٹنل کے آر پار چھٹے روز بھی بارشیں ہوئی جبکہ سونہ مرگ ، گلمرگ اور پہلگام کے ساتھ ساتھ امرناتھ گھپا پر بھی ہلکی برفباری ریکارڈ کی گئی ۔ ادھر گزشتہ پانچ روز سے جاری پیر پنچال کے آر پار موسلادار بارشوں نے وادی کے اطراف و اکناف میں جہاں معمول کی زندگی متاثر رہی وہیں مسلسل بارشوںکے نتیجے میںندی نالوں میں طغیانی آنے کے نتیجے میں وادی میں سیلابی صورتحال پیدا ہو گئی ہے جس کے نتیجے میں لوگوں میں خوف و ہراس پھیل گیا ہے۔ادھر جنوبی کشمیر کے کولگام میں ویشنو نالہ میں طیغانی آنے کے باعث سیلابی پانی رہائشی مکانوںمیں گھس گیا ، انتظامیہ نے فوری طور پر حرکت میں آکر کولگام کے کئی علاقوں کے لوگوں کو محفوظ مقامات کی طرف منتقل کیا ۔مسلسل بارشوں کے نتیجے میں دریا جہلم میں پانی کی سطح میں اضافہ ہونے اور کئی مقامات پر خطرے کے نشان کو پار کرنے کے بعد شہر سرینگر کے بیشتر علاقوں جبکہ جنوبی کشمیر میں ہائی الرٹ جاری کردیا گیااور لوگوں کو محفوظ مقامات کی طرف منتقل ہونے کےلئے کہا گیا ہے ۔ادھر شہرسرینگر سمیت وادی کے دیگر علاقوں میں پانی رہائشی علاقوں میں داخل ہونے کے نتیجے میں سیلابی صورتحال پیدا ہو گئی ہے جبکہ کئی اضلاع میں صورتحال ابتر ہونے کے بعد اسکولوں میں درس و تدریس کا عمل معطل رہا ۔ اسی دوران محکمہ موسمیات نے آج سے موسم میں بہتری آنے کے امکانات ظاہر کرتے ہوئے لوگوں کو احتیاط برتنے کی تلقین کی ہے ۔
سی این آئی کے مطابق گزشتہ پانچ دنوں سے جاری ٹنل کے آر پار موسلا دار بارشوں نے وادی کے اطراف و اکناف میں قہر بپا کر دیا ، دریاﺅں،ندی، نالوںمیں طیغانی آنے کے باعث لوگوں کو محفوظ مقامات کی طرف منتقل کیا جا رہا ہے۔ نمائندے کے مطابق جنوبی کشمیر کے علاقوںمیں بھی تیز بارشوں کے نتیجے میں دریاﺅں ، ندی ، نالوںمیں طغیانی آنے کے باعث سیلابی پانی رہائشی مکانوںمیں گھس رہا ہے اور لوگوں کو محفوظ مقامات کی طرف منتقل کیا جا رہا ہے۔ دریائے جہلم میں پانی کی سطح میں مسلسل اضافے اور اس کی معاون ندی نالوں میں پانی کی سطح میں خطرناک حد تک اضافہ ہوا ہے ۔
