ملاپورم: کیرالا کے ضلع ملاپورم میں ایک دلچسپ معاملہ سامنے آیا جہاں ماں اور بیٹے نے ایک ہی وقت میں کیرالہ پبلک سروس امتحان کی رینک لسٹ میں جگہ بنا کر تاریخ رقم کی۔ ملاپورم کی رہنے والے بندو (42 برس) اور ان کے بیٹے وویک (24 برس) نے یہ منفرد کارنامہ اس وقت انجام دیا جب بندو نے لوور گریڈ سرونٹ کی فہرست میں 92 واں اور ان کے بیٹے وویک نے لوور ڈویژن کلرک رینک کی فہرست میں 38 واں رینک حاصل کیا۔
بندو نے پچھلے سات برسوں میں سات مرتبہ پبلک سروس کمیشن کا امتحان دیا، یہ ان کی آخری کوشش تھی جس میں انہوں نے کامیابی حاصل کی۔ اس بارے میں بندو نے کہا کہ سرکاری نوکری حاصل کرنے کے ان کے خواب نے انہیں سخت محنت کرنے کی ترغیب دی۔ بندو آئی سی ڈی سی سپرنٹنڈنٹ کا امتحان بھی لکھ چکی ہیں اور وہ اس امتحان میں بہتر رینکنگ کی توقع کر رہی ہے۔ بندو گزشتہ 11 برسوں سے ایریا کوڈ میں آنگن واڑی ٹیچر کے طور پر کام کر رہی ہیں۔ انہیں سال 2019-20 میں بہترین آنگن واڑی ٹیچر کا ریاستی ایوارڈ بھی مل چکا ہے۔
اسی دوران بندو کے بیٹے وویک نے بھی اپنی ماں کی طرح سرکاری نوکری حاصل کرنے کا خواب دیکھا تھا۔ وہ گزشتہ ڈھائی برسوں سے سخت محنت کر رہا تھا اور روں برس اسے کامیابی حاصل ہوئی۔ وویک کافی خوش ہے کہ وہ اپنی پہلی کوشش میں ہی رینک لسٹ میں شامل ہوگیا۔ واضح رہے کہ بندو کے شوہر چندرن، ایڈاپل ڈپو میں کیرالہ روڈ ٹرانسپورٹ کارپوریشن کے ملازم ہیں۔ وویک کے علاوہ اس جوڑے کی ایک بیٹی ہے۔
