سرینگر: جموں و کشمیر پولیس کے ڈائریکٹر جنرل دلباغ سنگھ نے کہا کہ سکیورٹی فورسز نے یوم آزادی کی تقریبات کو پُرامن اور محفوظ طریقے سے منانے کے لئے تمام تیاریاں کی گئی ہیں۔ دلباغ سنگھ نے کہا کشمیر میں نوجوانوں کی عسکری صفوں میں شامل ہونے کی تعداد کم ہوگئی ہے کیونکہ دراندازی کم ہوگئی ہے اور سکیورٹی فورسز بھی نوجوانوں کو یہ راہ اختیار کرنے سے روک رہے ہیں۔
سرینگر میں ‘ہر گھر ترنگا’ مہم کے دوران دلباغ سنگھ نے میڈیا کو بتایا کہ ایل او سی کے اس پار لانچ پیڈ پر کئی کشمیری نوجوان جو عسکری ٹریننگ کے لئے سرحد پار گئے تھے لیکن سکیورٹی فورسز نے ایسی بہت سی کوششوں کو ناکام بنا دیا ہے۔ ان کا کہنا ہے کہ کچھ کشمیری نوجوان ویزا کے ذریعے پاکستان تعلیم کے بہانے گئے تھے لیکن وہاں عسکری کیمپوں میں ٹریننگ لی اور واپسی پر یہاں ہلاک کئے گئے۔ انہوں نے کہا کہ دراندازی کی سازشیں اس پار سے جاری ہیں لیکن سکیورٹی فورسز ان کو ناکام کردیں گے۔
ڈی جی پی دلباغ سنگھ نے مزید کہا کہ ‘جموں و کشمیر میں حالات کافی بہتر ہوچکے ہیں جس میں عوام نے سکیورٹی فورسز کا ساتھ دیا اور آج کشمیر میں تعلیمی ادارے و سرکاری دفاتر بغیر کسی خلل کے کھلے رہتے ہیں۔ انہوں نے کہا کہ یوم آزادی کو بہتر اور محفوظ طریقے سے منانے کے لئے سیکورٹی کے تمام انتظامات کے گئے ہیں۔ واضھ رہے کہ پیر کو ملک کے ساتھ ساتھ جموں و کشمیر میں 75 واں یوم آزادی منایا جائے گا جس کے لئے ہر ضلع اور شہر سرینگر میں سرکاری تقریبات منعقد کی جارہی ہے۔
