سری نگر//جموں و کشمیر کے لیفٹیننٹ گورنر منوج سنہا نے منگل کو کہا کہ مرکزی حکومت اور جموں و کشمیر انتظامیہ ناممکن چیزوں کو ممکن بنانے کی ہر ممکن کوشش کر رہی ہے تاکہ جموں و کشمیر کے نوجوان اپنے مقاصد تک پہنچ سکیں۔
انڈور سپورٹس اسٹیڈیم سری نگر میں 28ویں ماسٹرز نیشنل ٹیبل ٹینس چیمپئن شپ کی افتتاحی تقریب کے موقع پر خطاب کرتے ہوئے سنہا نے کہا کہ جو لوگ کھیلوں کی سرگرمیوں میں ٹیلنٹ رکھتے ہیں، انہیں اپنی صلاحیتوں اور ہنر کو دکھانے کا ہر موقع فراہم کیا جا رہا ہے۔
انہوں نے کہا کہ جموں و کشمیر سپورٹس کونسل اور یوتھ سروسز اینڈ سپورٹس ڈپارٹمنٹ جموں و کشمیر میں نوجوانوں تک پہنچنے اور انہیں ایک پلیٹ فارم فراہم کرنے کے لئے ہر ممکن کوششیں کر رہے ہیں تاکہ وہ کھیلوں کے میدان میں جموں و کشمیر اور پورے ملک کا سر فخر سے بلند کر سکیں۔
انہوں نے کہا کہ واٹر سپورٹس ہو، کرکٹ ہو، فٹ بال، ووشو، ٹیبل ٹینس، ہاکی اور دیگر کھیلوں کا شعبہ ہو، بہتر کوچنگ اور کھیلوں کا بہتر انفراسٹرکچر فراہم کرنے کی کوشش کی جا رہی ہے تاکہ کھیلوں کے کھلاڑیوں کو ہر قسم کی سپورٹ فراہم کی جائے۔
ایل جی سنہا نے جے کے اسپورٹس کونسل کے تعاون سے سری نگر میں ٹیبل ٹینس چیمپئن شپ منعقد کرنے اور جموں و کشمیر کے نوجوانوں کو اس شعبے میں اپنی مہارت اور صلاحیتوں کو ظاہر کرنے کے لیے ایک پلیٹ فارم فراہم کرنے پر ٹیبل ٹینس ایسوسی ایشن کا شکریہ بھی ادا کیا۔
انہوں نے مزید کہا کہ جے کے اسپورٹس کونسل اور یوتھ سروس اینڈ سپورٹس ڈیپارٹمنٹ کی کوششوں سے جموں و کشمیر کے 5000 سے زیادہ ہائیر سیکنڈری اسکولوں میں ٹیبل ٹینس چیمپئن شپ کا انعقاد کیا جا رہا ہے۔
