امت نیوز ڈیسک //
پاکستان کے وزیراعظم شہباز شریف نے بدھ کے روز ایک ٹویٹ میں سیلاب سے انسانی اور مادی نقصان پر اظہار تعزیت کے لیے وزیراعظم نریندر مودی کا شکریہ ادا کیا۔ چند روز قبل وزیراعظم نریندر مودی نے پڑوسی ملک پاکستان میں سیلاب سے ہونے والی تباہی پر غم کا اظہار کرتے ہوئے سیلاب متاثرین سے اپنی دلی تعزیت کا اظہار کیا تھا۔
پاکستان ان دنوں تباہ کن سیلاب کی زد میں ہے۔ سیلاب کی وجہ سے اب تک گیارہ سو سے زائد افراد جان کی بازی ہار چکے ہیں۔ وزیراعظم مودی نے چند روز قبل پاکستان میں سیلاب کی بگڑتی ہوئی صورتحال کے درمیان اپنی جانیں گنوانے والے لوگوں کے تئیں تعزیت کا اظہار کیا تھا۔ وہیں آج پاکستان کے وزیر اعظم شہباز شریف نے ملک میں سیلاب کی وجہ سے بگڑتی ہوئی صورتحال کے حوالے سے ایک ٹویٹ کیا۔ اس ٹویٹ میں انہوں نے لکھا کہ میں سیلاب سے انسانی اور مادی نقصان پر اظہار تعزیت کے لیے پی ایم مودی کا شکریہ ادا کرتا ہوں۔ انشاء اللہ ہم جلد ہی اس قدرتی آفت کے منفی اثرات پر قابو پا کر اپنی زندگیوں اور معاشروں کی تعمیر نو کریں گے۔
قابل ذکر ہے کہ چند روز قبل پی ایم مودی نے پاکستان میں سیلاب کے بارے میں ایک ٹویٹ کیا تھا۔ انہوں نے اپنی ٹوئٹ میں پڑوسی ملک میں سیلاب سے ہونے والی تباہی پر افسوس کا اظہار کیا تھا اور اس قدرتی آفت سے متاثرہ لوگوں اور ان کے خاندانوں سے تعزیت کا اظہار بھی کیا تھا۔ پی ایم مودی نے ٹویٹ میں لکھا، "پاکستان میں سیلاب سے ہونے والی تباہی کو دیکھ کر دکھ ہوا۔ ہم متاثرین، زخمیوں اور اس قدرتی آفت سے متاثر ہونے والے تمام افراد کے اہل خانہ سے تعزیت کا اظہار کرتے ہیں اور وہاں معمولات کی جلد بحالی کی امید کرتے ہیں۔
