احمد آباد: 2002 کے گجرات فسادات سے متعلق مبینہ طور پر من گھڑت ثبوت پیش کرنے کے معاملے میں سپریم کورٹ کی جانب سے عبوری ضمانت منظور کرنے کے ایک دن بعد، سماجی کارکن تیستا سیتلواڑ ہفتہ کو سابرمتی سینٹرل جیل سے باہر چلی گئیں۔ سیتلواڑ 26 جون کو گرفتاری کے بعد سے احمد آباد کی سابرمتی سینٹرل جیل میں بند تھے۔
سپریم کورٹ کے حکم کے مطابق سیتلواڑ کو آج سیشن جج وی اے رانا کے سامنے ضمانت کی کارروائی کے لیے پیش کیا گیا۔ اسپیشل پبلک پراسیکیوٹر امت پٹیل نے کہا، ’’سیشن کورٹ نے عدالت عظمیٰ کی طرف سے عائد کردہ شرائط کے علاوہ دو دیگر شرائط بھی عائد کیں۔ سیشن کورٹ نے سیتلواڑ کو 25000 روپے کے ذاتی مچلکے جمع کرانے اور اس کی پیشگی اجازت کے بغیر بھارت نہ چھوڑنے کا حکم دیا۔قابل ذکر ہے کہ گزشتہ روز سپریم کورٹ نے تیستا سیتلواڑ کو عبوری ضمانت دے دی تھی۔ عدالت نے کہا تھا کہ ہائی کورٹ ان کی باقاعدہ ضمانت پر اپنا فیصلہ سنا سکتی ہے۔ فی الحال انہیں عبوری ضمانت مل گئی ہے۔ حکم نامے میں عدالت نے یہ بھی واضح کیا تھا کہ تیستا کو اپنا پاسپورٹ سونپنا ہوگا۔ جب تک انہیں ہائی کورٹ سے باقاعدہ ضمانت نہیں مل جاتی وہ ملک سے باہر نہیں جا سکتیں۔ دوسری طرف تیستا کو اس معاملے میں تحقیقاتی ایجنسیوں کو مسلسل تعاون دینا ہوگا۔ عدالت کا کہنا ہے کہ وہ تیستا کو ضمانت پر نہیں چھوڑ رہے، جب تک ہائی کورٹ ریگولر ضمانت پر فیصلہ نہیں دیتی، عدالت انہیں عبوری ضمانت دے رہی ہے۔
واضح رہے کہ جس کیس میں یہ سماعت ہوئی ہے وہ 2002 کے گجرات فسادات سے متعلق ہے۔ تیستا پر گواہوں کو اکسانے کا الزام ہے۔ سپریم کورٹ نے اُس وقت کے گجرات کے وزیر اعلی نریندر مودی کو دی گئی کلین چٹ کی ایس آئی ٹی کی رپورٹ کو چیلنج کرنے والی ذکیہ جعفری کی عرضی پر سماعت کرتے ہوئے کہا کہ تیستا سیتلواڑ اپنی خود غرضی کو ثابت کرنے میں مصروف ہیں۔ عدالت نے سنجیو بھٹ اور آر بی سری کمار کے ‘مبینہ جھوٹے حلف ناموں’ کا بھی حوالہ دیا تھا۔ فی الحال عدالت نے دونوں فریق کے دلائل سننے کے بعد تیستا سیتلواڑ کو بڑی راحت دی ہے۔ جمعرات کو بھی سماعت کے دوران یہ کہا گیا کہ تیستا پر ایسی کوئی دفعہ نہیں لگائی گئی کہ انہیں ضمانت نہیں دی جا سکتی۔ آج جمعہ کو بھی سپریم کورٹ نے اصرار کیا کہ تیستا کو عبوری ضمانت دی جا سکتی ہے۔
