سرینگر//پاکستان سے منشیات کی سمگلنگ، ملٹنسی سے متعلق معاملات اور دیگر جرائم کے کسیوں کی تحقیقات کے سلسلے میں قومی تحقیقاتی ایجنسی (این آئی اے ) کی جانب سے آج متعدد ریاستوں میں چھاپے ڈالے گئے جس دوران کئی ثبوت اور دیگر دستاویزات برآمد کرنے کا دعویٰ کیا گیا ہے ۔ NIA نے سوموار کو تین ریاستوں میں مبینہ ملٹنسی کے واقعات ، منشیات کی سمگلنگ اور دیگر جرائم سے متعلق معاملے کے سلسلے میں چھاپے مارے، جبکہ پنجابی گلوکار سدھو موسی والا کے قتل معاملے کے حوالے سے بھی کئی جگہوں پر چھاپے ڈالے گئے ۔ حکام نے کہا کہ پنجاب، اتر پردیش اور ہریانہ میں چھاپے مارے جا رہے تھے اور ان مقامات میں گولڈی برار اور جگو بھگوان پوریا کی رہائش گاہیں بھی شامل تھیں جو موسی والا کے قتل میں بھی ملزم ہیں۔نیشنل انویسٹی گیشن ایجنسی (این آئی اے) پاکستان سے منشیات کی اسمگلنگ میں پنجاب میں گروہوں کے مبینہ طور پر ملوث ہونے اور اس رقم کو بعد میں دہشت گردی سے متعلق سرگرمیوں میں ڈالے جانے کے معاملے کی تحقیقات کر رہی ہے۔انہوں نے بتایا کہ یہ چھاپے یمنا نگر، مجیٹھا روڈ، مکتسر، گرداس پور اور گروگرام میں مارے گئے۔
