امت نیوز ڈیسک //
اتراکھنڈ: اتراکھنڈ وقف بورڈ کے چیئرمن شاداب شمس کے مدارس سے متعلق بیان پر وزیر اعلی پُشکر سنگھ دھامی کا رد عمل سامنے آیا ہے۔ وزیر اعلی اتراکھنڈ کے مدارس کے سروے کو منظوری دے دی ہے۔ ان کا کہنا ہے کہ مدارس کے حوالے سے وقتا فوقتا تمام طرح کی باتیں سامنے آتی رہتی ہیں۔ ایسے میں تحقیقات ضروری ہے تاکہ حقیقت سامنے آسکے۔ غور طلب ہے کہ اترپردیش میں بھی مدارس کا سروے کیا جارہا ہے۔ ساتھ ہی غیر قانونی مدارس کو منہدم کیا جارہا ہے۔
اتراکھنڈ کے بھی مدارس کا سروے ہوگااسی طرز پر اب اتراکھنڈ میں بھی مدارس کا سروے کرایا جائے گا۔ بتادیں کہ اتراکھنڈ کے وقف بورڈ نئے صدر منتخب ہونے کے بعد شاداب شمس نے وقف بورڈ کی جائیداد کا سروے کرانے کی بات کہی ہے۔ جن پر غیر قانونی طریقے سے قبضہ کیا گیا ہے۔ ساتھ ہی شاداب شمس نے حکومت سے سرکاری امداد یافتہ مدارس کا بھی سروے کرانے کی بات کی۔
شاداب شمس نے ہریدوار پیران کلیئر مزار سے متعلق ایک بیان دیا ہے۔ جس کے مخالفت بھی کی جارہی ہے۔ شاداب نے کہا کہ پیران کلیئر اسمگلنگ اور نشے کا اڈہ بنتاجارہا ہے۔ انہوں نے اس معاملے پر پولیس افسران سے بھی بات چیت کی۔اس کے لیے انہوں نے مقامی انٹیلی جنس یونٹ کی رپورٹ کا حوالہ بھی دیا ہے۔ اتنا ہی نہیں انہوں نے یہ بھی بتایا کہ دارالعلوم قادریہ سنواریہ کے منیجر نے بھی انہیں خط بھیج کر یہ اطلاع دی ہے۔
حالانکہ ان کے بیان کا حکومت کی جانب سے کوئی رد عمل سامنے نہیں آیا ہے۔ لیکن بورڈ کی جائیداد پر غیرقانونی قبضہ کو لے کر حکومت نے صاف طور پر کہا کہ ایسے غیر قانونی قبضہ پر سخت کارروائی کی جائے گی۔ وزیر اعلی پشکر سنگھ دھامی نے شاداب شمس کے مدارس میں ہونے والے سروے پر صاف کہا ہے کہ مدارس میں سروے کی ضرورت ہے اور اتراکھنڈ کے مدارس میں جلد ہی سروے کرایا جائے گا۔
