امت نیوز ڈیسک //
کیف : یوکرین کے صدر ولادیمیر زیلینسکی ٹریفک حادثے میں زخمی ہوگئے جنہیں فوری طور پر طبی امداد کیلئے مقامی اسپتال روانہ کیا گیا۔اس حوالے سے یوکرینی صدر کے ترجمان نکیفوروف نے میڈیا کو بتایا کہ ولادیمیر زیلینسکی کو دارالحکومت کیف کی ایک شاہراہ پر ٹریفک حادثہ پیش آیا جس میں وہ زخمی ہوگئے تاہم چوٹ زیادہ گہری نہیں ہے۔ترجمان نے بتایا کہ شاہراہ پر ایک تیز رفتار کار صدر کی کار اور ان کے محافظوں کی گاڑی سے ٹکرا گئی۔ حادثے کے بعد صدر کو فوری طور پر اسپتال لے جایا گیا۔ طبی معائنہ کے بعد ڈاکٹروں نے بتایا کہ ان کو شدید چوٹ نہیں آئی ہے۔غیر ملکی خبر رساں ادارے کی رپورٹ کے مطابق دوسری کار میں موجود ڈرائیور کو بھی ابتدائی طبی امداد زیلنسکی کے طبی عملہ نے ہی فراہم کی۔یوکرینی صدر کو پیش آنے والے حادثہ کے کچھ دیر بعد ہی زیلنسکی کے دفتر نے ان کا خطاب جاری کردیا۔ اپنے خطاب میں زیلنسکی نے کہا کہ وہ خار کیف کے شہر ایزوم سے واپس آئے ہیں۔ یاد رہے خار کیف تقریبا سارا آزاد ہوچکا ہے۔روس سے واپس حاصل کیے گئے علاقوں میں خار کیف کے شہر ایزیوم میں زیلنسکی کا یہ پہلا دورہ تھا۔ 25ویں بریگیڈ نے فیس بک پر اعلان کیا ہے کہ اس شہر میں زیلنسکی نے یوکرینی پرچم لہرانے کے جشن میں شرکت کی۔زیلنسکی نے ٹیلی گرام اکاونٹ پر اپنے فوجیوں کے ساتھ اپنی ایک تصویر شیئر کی اور ساتھ منسلک پیغام میں کہا کہ ازیم میں پہلے ہی یوکرین کا پیلا اور نیلا جھنڈا لہرا رہا ہے۔واضح رہے یوکرینی افواج نے اپنے علاقے واپس لینے کے لیے جوابی حملے کیے تھے جس کے باعث گزشتہ ہفتے روس نے خار کیف سے پسپائی کا اعلان کردیا تھا۔
