امت نیوز ڈیسک //
نئی دہلی: آج آر ایس ایس کے سربراہ موہن بھاگوت سے ملاقات کے بعد آل انڈیا امام آرگنائزیشن کے سربراہ امام عمر احمد الیاسی نے موہن بھاگوت کو ‘راشٹر پتا (فادر آف نیشن) اور ‘راشٹر رشی’ قرار دیا ہیں۔ وہیں پی ٹی آئی نے ٹوئٹ کیا کہ اس موقع پر مولانا الیاسی نے کہا کہ ہم سب کا ڈی این اے ایک ہے جبکہ صرف خدا کی عبادت کرنے کا طریقہ مختلف ہے۔
عمر احمد الیاسی نے موہن بھاگوت کو ’فادر آف نیشن‘ قرار دیاالیاسی نے کہاکہ ’موہن بھاگوت کا ہمارے پاس آنا ایک اعزاز ہے۔ بھاگوت ہم سے ملاقات کے لیے امام ہاؤس آئے اور وہ ہمارے راشٹر پتا اور راشٹر رشی ہیں‘۔ ملک کی یکجہتی اور سالمیت کو برقرار رکھا جائے۔ ہم سب مختلف طریقے سے عبادت کر سکتے ہیں، لیکن اس سے پہلے ہم سب انسان ہیں۔ ہم ہندوستان میں رہتے ہیں اور ہندوستانی ہیں۔ انہوں نے کہاکہ ’ہندوستان وشو گرو بننے کے راستے پر ہے اور ہم سب کو اس کے لیے کوشش کرنی چاہیے‘۔وہاں موجود صحافیوں نے جب الیاسی سے دوبارہ دریافت کیا کہ کیا انہوں نے بھاگوت کو ‘راشٹر پیتا’ کہا ہے تو الیاسی نے کہا، ”بالکل، وہ ‘راشٹر پیتا’ (قوم کے باپ) ہیں۔
راشٹریہ سویم سیوک سنگھ (آر ایس ایس) کے سربراہ موہن بھاگوت نے جمعرات کو ‘آل انڈیا امام سنگٹھن’ کے سربراہ امام عمر احمد الیاسی سے ملاقات کی۔ یہ ملاقات کستوربا گاندھی مارگ میں واقع مسجد میں ایک بند کمرے میں ہوئی، جہاں دونوں رہنماوں کے درمیان ایک گھنٹے سے زیادہ تک میٹنگ جاری رہی۔ بھاگوت کے ساتھ آر ایس ایس کے سینئر عہدیدار کرشنا گوپال، رام لال اور اندریش کمار بھی موجود تھے۔ آر ایس ایس سربراہ فرقہ وارانہ ہم آہنگی کو مضبوط بنانے کے لیے مسلم دانشوروں سے بات چیت کر رہے ہیں۔
آر ایس ایس کے پرچار پرمکھ سنیل امبیکر نے کہا کہ آر ایس ایس کے سرسنگھ چالک تمام فرقہ کے لوگوں سے ملتے ہیں۔ یہ عام مکالمہ کے عمل کا ایک حصہ ہے۔
