امت نیوز ڈیسک //
وزیراعظم نریندر مودی نے نئی دہلی میں ’نو منی فار ٹیرر‘ کانفرنس سے خطاب میں کہا ہے کہ کچھ ممالک اپنی ’خارجہ پالیسی کے حصے کے طور پر دہشت گردی کی معاونت‘ کرتے ہیں اور اس کا حساب ان ہی سے لیا جانا چاہیے۔
وزیراعظم نریندر مودی نے اپنے خطاب میں کہا: ’یہ بات سب کو معلوم ہے کہ دہشت گرد تنظیمیں مختلف ذرائع سے رقوم حاصل کرتی ہیں۔ ادارے اور افراد جو دہشت گردوں سے ہمدردی کی کوشش کرتے ہیں، انہیں بھی تنہا کیا جانا چاہیے۔‘
اپنے پڑوسی ممالک میں سے کسی کا بھی نام لیے بغیر وزیراعظم نے کہا کہ پراکسی وار بھی خطرناک ہے اور دنیا کو ہر قسم کی دہشت گردی کے خلاف اکٹھا ہونا چاہیے۔
انہوں نے کہا ”’عالمی تنظیموں کو یہ نہیں سمجھنا چاہیے کہ اگر کوئی جنگ نہیں ہو رہی تو اس کا مطلب ہے کہ ملک میں امن قائم ہے۔ پراکسی وار بھی خطرناک ہے اور جو ممالک دہشت گردی کی حمایت کرتے ہیں، اس کا حساب ان سے ہی لیا جانا چاہیے“
