امت نیوز ڈیسک //
راجوری: جموں و کشمیر کے راجوری میں ہوئے فائرنگ سانحہ کے بعد جموں و کشمیر کے لیفٹیننٹ گورنر منوج سنہا نےعلاقے کا دورہ کیا۔منوج سنہا نے کہا کہ اس واقعے میں ہلاک اور زخمی ہونے والے افراد کے اہلخانہ کو انصاف ملے گا۔
یاد رہے کہ گزشتہ روز نامعلوم بندوق برداروں نے راجوری کے ڈھنگری گاؤں میں گھروں میں گھس کر اندھا دھند فائرنگ کی جس کے نتیجے میں چار عام شہری ہلاک جبکہ چھ دیگر زخمی ہوئے ہیں۔ وہیں آج ڈانگری گاؤں میں مشتبہ دھماکہ ہوا، یہ دھماکہ گزشتہ کل فائرنگ کے واقعہ کے متاثرین کے گھر کے قریب ہوا۔ اس دھماکہ میں ایک بچی سمیت ایک 40 سالہ خاتون ہلاک ہوگئی ہے جبکہ تین دیگر زخمی ہوئے ہے۔
ایل جی منوج سنہا نے اہلخانہ کو یقین دلایا کہ سکیورٹی فورسز اس معاملے کی باریک بینی سے چھان بین کرے گی۔ انہوں نے کہا کہ اس واقعہ میں ملوث افراد کے خلاف سخت سے سخت کارروائی کی جائی گی۔ منوج سنہا نے اس حوالے سے متاثرہ خاندان کے ساتھ اظہار یکجہتی کا اظہار کیا۔ انہوں نے کہا کہ موت کا کوئی معاوضہ نہیں ہوتا ہے۔ انہوں نے علاقہ میں فائرنگ کے واقعہ کے بعد دھماکہ کی بھی انکوائری کا حکم دیا ہے۔
منوج سنہا کے ہمراہ جموں و کشمیر پولیس کے سربراہ دلباغ سنگھ، جموں رینچ کے اے ڈی جی پی مکیش سنگھ سمیت دیگر سینیئر پولیس افسران شامل تھے۔منوج سنہا نے اس واقعہ کے بعد اعلیٰ سطحی سکیورٹی صورتحال کی جائزہ میٹنگ بلائی ہے اور اس میٹنگ میں جموں و کشمیر پولیس، فوج اور نیم فوجی افسران شامل ہونگے۔
وہیں جموں و کشمیر پولیس کے سربراہ دلباغ سنگھ نے کہا کہ راجوری واقعہ افسوسناک ہے۔ اس واقعہ کی جتنی بھی مذمت کی جائے کم ہے۔ انہوں نے کہا کہ اس واقعے کے بعد سکیورٹی فورسز کام کر رہی ہے اور اس واقعہ میں ملوثین کے خلاف سخت سے سخت کارروائی کی جائی گی۔ انہوں نے کہا کہ یہ انسانیت کا قتل ہے اور ایسا کرنے والوں کو ہرگز بخشا نہیں جائیگا۔
دلباغ سنگھ نے اختجاج کررہے لوگوں کویقین دلایا کہ حملہ آوروں کو جلد سے جلد بےنقاب کیا جائیگا اور انہیں سخت سزا دی جائیگی۔
