امت نیوز ڈیسک //
جموں:جموں میں مذہبی کو ٹھیس پہنچانے کے الزام میں دو افراد کی گرفتاری ہوئی ہے۔ جموں میں حال ہی میں منعقدہ ایک ریلی میں ایک خاص طبقے کے خلاف قابل اعتراض نعرے لگانے کے الزام میں پولیس نے دو افراد کو گرفتار کیا ہے۔ پولیس نے یہ بھی کہا کہ "کسی بھی برادری کے مذہبی جذبات کو ٹھیس پہنچانا برداشت نہیں کیا جائے گا۔ پیپلز ڈیمو کریٹک پارٹی (پی ڈی پی) کی سربراہ محبوبہ مفتی نے ہفتہ کے روز اس واقعہ پر جموں و کشمیر انتظامیہ کو تنقید کا نشانہ بنایا تھا اور سوال کیا تھا کہ کیا نعرہ لگانے والوں کے خلاف کوئی کارروائی کی جا رہی ہے۔
سوشل میڈیا پلیٹ فارم ‘X’ ( ٹویٹر) پر ایک پوسٹ میں محبوبہ نے ویڈیو اپلوڈ کرتے ہوئے لکھا کہ "جب لیفٹیننٹ گورنر انتظامیہ کشمیر میں ترنگا یاترا میں مصروف تھی، جموں میں ایک اور واقعہ پیش آیا جہاں دائیں بازو کے انتہا پسندوں نے کھل کر مسلم نسل کشی کی بات کی۔ جموں و کشمیر کی سابق وزیر اعلیٰ محبوبہ نے اپنی اس پوسٹ میں ریلی کی ایک ویڈیو شیئر کرتے ہوئے مزید کہا کہ جموں میں ریلی میں ‘قتل سے متعلق نعرے’ لگائے گئے۔
انہوں نے سوال کیا کہ انتظامیہ نے ان مجرموں کے خلاف کیا کارروائی کی ہے؟ پولیس میڈیا سینٹر جموں نے اتوار کو پوسٹ کا جواب دیتے ہوئے کہا کہ اس معاملے میں ایف آئی آر درج کی گئی ہے اور دو لوگوں کو گرفتار کیا گیا ہے۔ پولیس نے واضح کیا کہ دو ملزمین کو گرفتار کر لیا گیا ہے۔ مستقبل میں مزید گرفتاریاں ہوں گی۔ جموں میں کسی بھی کمیونٹی کے مذہبی جذبات کو ٹھیس پہنچانے والے ایسے واقعات کو برداشت نہیں کیا جائے گا۔ جس پر محبوبہ نے کہا کہ میں پولیس کی اس ‘تیز کارروائی’ کی تعریف کرتی ہوں۔
