امت نیوز ڈیسک //
بڈگام :وسطی کشمیر کے ضلع بڈگام میں منگل کی شام ایک پیر کو اس کے پیروکاروں نے چاقو سے وار کر دیا ہے۔ اس حملے میں پیر کو معمولی چوٹ آئی ہے۔تفصیلات کے مطابق ایک پیر جن کی شناخت عبدالعزیز پرے ولد محمد اسماعیل پرے ساکن پرے آنگن، اومپورہ بڈگام کے طور پر ہوئی ہے کو ان کے پیروکاروں نے اسے اپنی رہائش گاہ پر چاقو سے حملہ کیا۔ اس حملے وہ زخمی ہوا ہے،جس کے بعد اسے علاج کے لیے نزدیکی ہسپتال لے جایا گیا جہاں پر اس کی حالت خطرے سے باہر بتائی جاتی ہے۔اس حملے میں پیر کو معمولی چوٹ آئی ہے۔
اس واقعے کی تصدیق پولیس کے ایک اہلکار نے کی ہے۔انہوں نے کہا کہ اس واقعے کے سلسلے میں ایک کیس درج کر لیا گیا ہے اور اس گھناؤنے فعل کے پیچھے کی حقیقت سے پردہ اٹھانے کے لیے مکمل تفتیش شروع کر دی گئی ہے تاکہ ملزموں کے خلاف قانونی کارروائی عمل میں لائی جائے۔
واضح رہے کہ حالیہ ایام کے دوران وادی کشمیر کے مختلف اضلاع میں ایسے 10 سے زائد معاملات سامنے آئے ہیں، جہاں چاقو یا چھری سے حملے کیے گئے ہیں اور ان میں 2 افراد کی موت بھی واقع ہوئی ہے۔کشمیر میں چھرا مارنے کے جرائم کی بڑھتی شرح انتہائی تشویشناک صورتحال اختیار کررہا ہے۔ ماہرین کہتے ہیں کہ وادی کشمیر میں پنپ رہے اس طرح کے نئے جرائم کے پیچھے کئی وجوہات کار فرما ہیں،جن میں بے قابو غصہ، صبر کی کمی، منشیات، غربت، سماجی اخراج، سوشل میڈیا اور ذہنی امراض وغیرہ شامل ہیں۔
بتادیں کہ سرینگر کے ڈی سی نے حال ہی میں چھرا گھونپنے کے بڑھتے واقعات کے پیش نظر ضلع بھر میں عوامی مقامات پر تیز دھار ہتھیاروں کی خرید و فروخت پر پابندی عائد کی ہے۔
