امت نیوز ڈیسک //
سری نگر، 21 ستمبر: سری نگر پولیس نے جمعرات کو جموں و کشمیر پولیس کے ایک ڈی ایس پی رینک کے افسر کو مختلف الزامات کے تحت گرفتار کیا ہے۔ خبر رساں ایجنسی کے ڈی سی تک پہنچنے والی رپورٹوں میں کہا گیا ہے کہ سری نگر پولیس کی ایک ٹیم نے منگل کے روز بی ایس این ایل ایکسچینج سنتھ نگر سری نگر کے قریب ڈی وائی ایس پی شیخ عادل مشتاق (کے پی ایس) کے گھر کی تلاشی لی۔ ذرائع کی مانیں تو "کچھ دستاویزات اور ایک لیپ ٹاپ کے علاوہ دیگر الیکٹرانک آلات بھی قبضے میں لے لیے گئے اور ایک کیس میں افسر سے پوچھ گچھ کی گئی”۔
سری نگر کی خبر رساں ایجنسی کشمیر ڈاٹ کام کے مطابق جمعرات کو افسر کو سری نگر پولیس نے پولیس سٹیشن نوگام میں ایف آئی آر کے تحت انڈین پینل کوڈ کی دفعہ 167، 193، 201، 210، 218، 221 اور 7، 7 اے بدعنوانی ایکٹ کے تحت باضابطہ طور پر گرفتار کیا تھا۔ مزید تفتیش شروع کردی گئی ہے۔
