امت نیوز ڈیسک //
سرینگر: وادی کشمیر میں امسال سالانہ امرناتھ یاترا 29 جون سے شروع ہونے کا امکان ہے۔ سرکاری ذرائع نے بتایا کہ لیفٹیننٹ گورنر منوج سنہا، جو شری امرناتھ شرائن بورڈ کے چیئرمین بھی ہیں، نے یہاں راج بھون میں اس یاترا کی تیاریوں اور انتظامات کے بارے میں تبادلہ خیال کرنے کے لئے ایک میٹنگ کی صدارت کی۔
انہوں نے کہا کہ 52 دنوں پر محیط یہ یاترا 19 اگست کو رکھشا بندھن کے موقعے پر اختتام پذیر ہوگی۔ ذرائع نے بتایا کہ لوک سبھا انتخابات کے ختم ہونے کے بعد انتظامیہ امرناتھ یاترا کی تیاریوں میں مصروف ہوجائے گی، جو امکانی طور پر 29 جون سے شروع ہو کر 19 اگست کو پایہ تکیمل کو پہنچے گی’۔
انہوں نے کہا کہ انتظامیہ کی طرف سے یاترا شروع ہونے کے باقاعدہ اعلان کے بعد اس کے لیے اگلے ماہ کے اواخر میں مختلف بینکوں میں رجسٹریشن شروع ہونے کی توقع ہے۔ قابل ذکر ہے کہ سال گذشتہ قریب ساڑھے چار لاکھ یاتریوں نے امرناتھ کی یاترا کی تھی۔
واضح رہے کہ امرناتھ گھپا جنوبی کشمیر کے ہمالیہ پہاڑیوں پر سطح سمندر سے 3 ہزار 8 سو 80 میٹر کی بلندی پر واقع ہے۔ اس گپھا کی یاترا ہندو مذہب میں انتہائی اہمیت کی حامل ہے اور ہر سال اس گپھا کی یاترا کے لیے ملک بھر سے ہزاروں کی تعداد میں یاتری آکر اس کا درشن کرتے ہیں۔(یو این آئی )
