امت نیوز ڈیسک //
جموں: آج کل انٹرنیٹ میڈیا کے بڑھتے ہوئے پھیلاؤ اور اس پر مختلف ریلیز بنا کر خود کو باصلاحیت ثابت کرنے کی دوڑ میں پولیس والے بھی پیچھے نہیں ہیں۔ یونیفارم پہنے اور سرکاری گاڑیوں میں بیٹھے کئی پولیس اہلکاروں کی ریلیز بھی انٹرنیٹ میڈیا پر دیکھی جا رہی ہیں اور ان ریلیز کو دیکھنے کے بعد ایس ایس پی جموں ونود کمار نے ایک سرکولر جاری کیا ہے۔
ایس ایس پی جموں کے جاری کردہ سرکولر میں پولیس اہلکاروں کو ڈیوٹی کے دوران اور وردی میں ویڈیو ریل نہ بنانے کی ہدایت کی گئی ہے۔ سرکولر میں کہا گیا ہے کہ پولیس اہلکار اپنے فرائض کی انجام دہی کے دوران اپنی وردی کا تقدس بھی برقرار رکھیں اور اپنے ہاتھوں میں پکڑے اسلحہ اور دیگر سامان کو ریلیز میں آویزاں نہ کریں۔
اس کے علاوہ سرکلر میں کہا گیا ہے کہ پولیس اہلکار کسی سیاسی گروپ کا حصہ نہیں بنیں گے اور نہ ہی ایسے گروپس کے پیجز کو لائیک کریں گے۔ اور نہ ہی پولیس اہلکار انٹرنیٹ میڈیا پر اپنے سیاسی خیالات کا اظہار کر سکیں گے۔
ایس ایس پی نے پولیس اہلکاروں کو الیکشن کمیشن کی ہدایات پر عمل کرنے کی ہدایت کرتے ہوئے کہا کہ وہ اپنے فرائض سختی سے انجام دیں، لیکن لوگوں کے ساتھ شائستہ انداز میں سلوک کریں۔ اگر کوئی ملازم ان ہدایات کی خلاف ورزی کرے گا تو اس کے خلاف سخت کارروائی کی جائے گی۔
اس معاملے میں ایس ایس پی جموں ونود کمار کا کہنا ہے کہ محکمہ پولیس نظم و ضبط کے ساتھ کام کرتا ہے۔ نظم و ضبط پر عمل کرنا سب کے لیے ضروری ہے۔ اس وقت الیکشن چل رہے ہیں اور ہماری کوشش ہے کہ تمام اہلکاروں کی توجہ اپنی ڈیوٹی پر مرکوز رہے۔
