امت نیوز ڈیسک //
جموں: ریمانڈ کی مدت میں توسیع کے لیے ڈکیتی کے ملزمان کے ساتھ جانی پور کورٹ کے احاطے میں پہنچنے والے پولیس اہلکاروں کو چکمہ دے کر ملزم فرار ہو گیا۔ ملزم ہتھکڑیاں بھی ساتھ لے گیا جو اس کی کلائی پر بندھی ہوئی تھیں۔ ملزم کو عدالت سے بھگانے میں بھٹنڈی کے ایک یوٹیوبر کا نام سامنے آیا ہے۔
جو پہلے سے ہی عدالت کی پارکنگ میں موٹرسائیکل لےکر ملزم کا انتظار کر رہا تھا اور جیسے ہی ملزم آیا تو اسے لے کر فرار ہو گیا۔ اس معاملے میں کارروائی کرتے ہوئے سینئر پولیس حکام نے ایک پروبیشنری سب انسپکٹر (پی ایس آئی) اور کانسٹیبل کو معطل کر دیا ہے۔ ایس پی او کے خلاف کارروائی کے لیے اعلیٰ حکام کو خط لکھ دیا گیا ہے۔ پولیس نے یوٹیوبر کو پکڑنے کے لیے کارروائی شروع کر دی ہے۔ گزشتہ سال جموں سری نگر قومی شاہراہ پر جموں کے جگتی علاقے میں پانچ افراد نے ایک گھر میں ڈکیتی کی تھی۔ کچھ دن قبل اس معاملے کے ایک ملزم بشارت محمود ساکن تھانہ منڈی، راجوری کو جگتی پولیس نے نگروٹہ سے گرفتار کیا تھا۔
بشارت نے پوچھ گچھ کے دوران بتایا کہ اس نے چوری کی واردات نگروٹہ تھانہ علاقے میں کی ہے۔ جس کی وجہ سے ملزم کو پوچھ گچھ کے لیے نگروٹہ پولیس کے حوالے کرنا پڑا۔ ملزم بشارت کے ریمانڈ کی مدت میں توسیع کے لیے پولیس اہلکار اسے جانی پور کورٹ لے کر جارہے تھے۔
اس دوران ایک کانسٹیبل بشارت کی ہتھکڑیاں پکڑے عدالت کے احاطے میں واقع دکان پر فوٹو سٹیٹس کروانے گیا۔ اس دوران پولیس اہلکاروں کو اکیلا دیکھ کر ملزم نے اسے دھکا دیا اور پولیس اہلکاروں کے ہاتھ سے ہتھکڑیاں پھسل گئیں۔
دکان کے قریب پارکنگ میں موٹر سائیکل پر سوار ایک شخص بشارت کا انتظار کر رہا تھا۔ عدالت کے احاطے سے فرار ہونے والا ملزم براہ راست موٹر سائیکل پر بیٹھ کر فرار ہو گیا۔
