امت نیوز ڈیسک //
سرینگر: نیشنل کانفرنس (این سی) کے صدر و سرینگر کے موجودہ رکن پارلیمنٹ ڈاکٹر فاروق عبداللہ نے سرینگر کے علاقہ خانیار میں ایک انتخابی جلسہ سے خطاب کرتے ہوئے مودی پر الزام عائد کیا کہ وہ اقتدار پر برقرار رہنے کےلئے ہندوؤں میں خوف و ہراس پیدا کرنے کی کوشش کررہے ہیں۔ ڈاکٹر فاروق نے این سی کے لوک سبھا امیدوار آغا سید روح اللہ مہدی کی حمایت میں انتخابی ریلی سے خطاب کیا۔ انہوں نے وزیر اعظم مودی کے حالیہ تبصروں پر اپنے شدید ردعمل کا اظہار کرتے ہوئے کہا کہ مودی نے ہندوؤں کو منگل سوتر اور مسلمانوں کے نام سے ڈرانے کی کوشش کررہے ہیں۔
مودی کے بیان پر فاروق عبداللہ نے شدید تنقید کرتے ہوئے کہا کہ ہم اپنی ماؤں اور بہنوں کے منگل سوتر کی حفاظت کریں گے۔ انہوں نے مودی پر ہندوؤں اور مسلمانوں کے درمیان دشمنی پیدا کرنے کا بھی الزام عائد کیا اور مسلمانوں کو زیادہ بچے پیدا کرنے والے قرار دینے سے متعلق مودی کے بیان کی شدید الفاظ میں مذمت کی۔ انہوں نے مودی کی جانب اشارہ کرتے ہوئے کہا کہ ’ہم ان کے زوال کے لیے دعا گو ہیں، ان کے دعوے جھوٹے ہیں‘۔
ڈاکٹر فاروق عبداللہ نے صحت کے مسائل کی وجہ سے لوک سبھا انتخابات میں حصہ نہ لینے کا فیصلہ کیا ہے۔ انہوں نے جموں و کشمیر کی صورتحال پر بات کرتے ہوئے اہم انتظامی اداروں میں میں غیرمقامی عہدیداروں کی تقرری پر تنقید کی۔ انہوں نے کہا کہ سینئر پولیس حکام سے لیکر ڈپٹی کمشنر تک سبھی غیرمقامی عہدیدار ہیں۔
