امت نیوز ڈیسک //
سرینگر: اپنی پارٹی کے صدر سید محمد الطاف بخاری نے لوک سبھا انتخابات کے حوالے سے میرواعظ عمر فاروق کے اس بیان کا خیرمقدم کیا جس میں انہوں نے کہا تھا کہ ’انتخابی عمل میں شرکت کو ریفرنڈم کے طور پر نہیں سمجھا جانا چاہئے‘۔ سرینگر کے پرانے شہر فتح کدل میں ایک انتخابی ریلے سے خطاب الطاف بخاری نے کہاکہ میں میر واعظ عمر فاروق کے اس بیان کی ستائش کرتا ہوں کہ انتخابات کو ریفرنڈم کے برابر نہیں کیا جانا چاہیے۔ انہوں نے کہا کہ جو لوگ کہتے ہیں کہ یہ الیکشن ریفرنڈم سے کم نہیں ہے وہ کشمیر کو پھر سے غلط راستے پر لے جارہے ہیں۔
انہوں نے ان سیاسی لیڈروں پر تنقید کی جو ایک وقت رائے شماری کا نعرہ دینے والے ایک بار پھر جموں و کشمیر کے لوگوں کو دھوکہ دے رہے ہیں۔ ریفرنڈم نام پر جموں و کشمیر میں غیر یقینی صورتحال پیدا کرنے کی کوشش کر رہے ہیں۔ انہوں نے ریلی میں شرکت کرنے پر سرینگر کے لوگوں کا شکریہ ادا کرتے ہوئے کہاکہ میں لوگوں کو یقین دلانا چاہتا ہوں کہ اپنی پارٹی آپ کے درپیش چیلنجز کے خاتمے کے لیے کام کرے گی اور وہ تمام مشکلات و مساٰئل دور کرنے کی کوشش کرے گی جس کا اس وقت آپ کو سامنا ہے۔
