امت نیوز ڈیسک //
پونچھ، 04 مئی : جموں کے پونچھ ضلع میں ہفتہ کو ملی ٹینٹوں کی طرف سے فوجی قافلے پر فائرنگ کے نتیجے میں ہندوستانی فضائیہ (آئی اے ایف) کا ایک اہلکار ہلاک جبکہ چار دیگر زخمی ہوگئے، حکام نے بتایا۔
یہ حملہ سورنکوٹ کے سنائی گاؤں میں ہوا۔ ایک اہلکار نے نیوز ایجنسی کشمیر اسکرول کو بتایا کہ زخمی اہلکاروں کو ادھم پور کے ایک اسپتال میں پہنچایا گیا جہاں ایک نے زخموں کی تاب نہ لاتے ہوئے دم توڑ دیا۔
انہوں نے کہا کہ بھارتی فوج اور پولیس کی کمک کو تفصیلات کا پتہ لگانے کے لیے علاقے میں پہنچایا گیا ہے۔ اہلکار نے بتایا کہ فوج اور پولیس اس واقعے میں ملوث ملی ٹینٹوں کے خلاف کارروائیوں میں مصروف تھے۔ حکام نے بتایا کہ مقامی راشٹریہ رائفلز یونٹ نے علاقے کو گھیرے میں لے کر تلاشی کی کارروائیاں شروع کر دیں۔ انہوں نے کہا کہ گاڑیوں کو شاہستار کے قریب جنرل ایریا میں ایئر بیس کے اندر محفوظ کیا گیا تھا۔
انہوں نے مزید کہا کہ زخمی فوجیوں کو علاج کے لیے ادھم پور کے کمانڈ ہسپتال میں ہوائی جہاز سے لے جایا گیا۔( کشمیر اسکرول )
