امت نیوز ڈیسک //
بارہمولہ : شمالی کشمیر میں لوک سبھا نشست بارہمولہ الیکشن کے دوران پٹن قصبے میں پولنگ اسٹیشن پر ہوئے مبینہ طور حملہ کے نتیجے میں جموں و کشمیر پولیس نے جموں کشمیر پیپلز کانفرنس (پی سی) لیڈر عمران رضا انصاری کے خلاف مقدمہ درج کیا ہے۔ معلوم ہوا ہے کہ حملہ میں ایک اسٹیشن ہاؤس آفیسر (ایس ایچ او) سمیت دو پولیس اہلکار زخمی ہو گئے جنہیں ٹراما اسپتال ریفر کر دیا گیا۔
بلاک میڈیکل آفیسر، پٹن ڈاکٹر طاہا خان نے کی تصدیق کرتے ہوئے کہ ایک پولیس افسر سمیت دو افراد زخمی حالت میں ٹراما ہسپتال پٹن پہنچائے گئے جنہیں ابتدائی طبی امداد کے بعد جی ایم سی بارہمولہ ریفر کر دیا گیا۔ عینی شاہدین نے بتایا کہ جموں کشمیر پیپلز کانفرنس (پی سی) کے رہنما عمران رضا انصاری اپنے حامیوں کے ہمراہ پٹن کے ایک پولنگ اسٹیشن میں داخل ہوئے اور مبینہ طور گڑ بڑ کرنے کی کوشش کی۔ ایس ایچ او پٹن نے مداخلت کی تو انصاری اور ان کے کچھ حامیوں نے مبینہ طور پر پولیس افسر پر حملہ کیا۔ عینی شاہدین نے مزید کہا کہ پولیس افسر کی ناک سے خون بہہ رہا تھا اور اس کی ناک کی ہڈی بھی ٹوٹ گئی تھی۔
ایس ایچ او پٹن خالد فیاض نے ایک خبر رساں ادارے کہ بتایا کہ وہ KP پائین ہانجیوارا کے ایک پولنگ اسٹیشن پر موجود تھے اور سب کچھ نارمل تھا تاہم عمران انصاری اور ان کے حامی اچانک پولنگ اسٹیشن پر نمودار ہوئے اور گڑبڑ کرنے کی کوشش کی۔ ایس ایچ او کے مطابق ’’انہوں نے پولنگ سٹیشن کے دروازے اور کھڑکیوں کو توڑنے کی کوشش کی اور جب ہم نے مداخلت کی تو اس نے (عمران انصاری) اور اس کے حامیوں نے مجھ پر حملہ کیا۔‘‘ جموں کشمیر پولیس نے اس ضمن میں گرفتاریاں بھی کی ہیں اور عمران انصاری اور اس کے حامیوں کے خلاف ایف آئی آر بھی درج کر لی ہے۔
