امت نیوز ڈیسک //
چنڈی گڑھ: بنیاد پرست سکھ رہنما اور کھڈور صاحب سیٹ سے نومنتخب رکن پارلیمنٹ امرت پال سنگھ اس وقت آسام کی ڈبرو گڑھ جیل میں بند ہیں۔ اب ان پر اور ان کے دیگر نو ساتھیوں پر لگائے گئے این ایس اے میں ایک سال کی توسیع کر دی گئی ہے۔
امرت پال سنگھ نے لوک سبھا انتخابات میں بھاری اکثریت سے کامیابی حاصل کی ہے۔ پنجاب حکومت کے امور داخلہ اور محکمہ انصاف نے لوک سبھا انتخابات کے نتائج آنے سے ایک دن قبل ہی یعنی 3 جون کو اس توسیع کا حکم دے دیا تھا، لیکن اس احکامات کی تفصیلات بدھ کو میڈیا کو سامنے آئیں۔
ڈبرو گڑھ جیل میں امرت پال: امرت پال سنگھ، جو ‘وارس پنجاب دے’ کے سربراہ ہیں مارچ 2023 سے این ایس اے کے تحت آسام کی ڈبرو گڑھ جیل میں بند ہیں۔ این ایس اے ایک ایسا قانون ہے جو حکومت کو اس بات کی اجازت دیتا ہے کہ وہ کسی بھی افراد کو جس کو وہ ملک کی سلامتی کے لیے خطرہ سمجھیں اسے 12 ماہ تک بغیر کسی الزامات کے حراست میں رکھ سکتی ہے۔ امرت پال سنگھ ایک سال سے زیادہ عرصے سے جیل میں ہیں۔
انتخابات سے پہلے امرت پال کے خاندان نے اسے اور ان کے نو ساتھیوں کو پنجاب کی جیل منتقل کرنے کی کئی کوششیں کیں لیکن وہ ناکام رہے۔آخر کار ان کے خاندان نے امرت پال سنگھ کو لوک سبھا انتخابات میں میدان میں اتار دیا۔ حیرت کی بات یہ ہے کہ کھڈور صاحب کے لوگوں نے امرت پال کو 1.97 لاکھ ووٹوں کے فرق سے جیتا بھی دیا۔
بھارتی قواعد کے مطابق امرت پال سنگھ کو 6 ماہ کے اندر پارلیمنٹ پہنچ کر حلف لینا ہوگا۔ اس کے لیے انھیں ایک دن کی پیرول بھی مل سکتی ہے۔
انتخابی نتائج کے بعد اگر حکومت امرت پال سنگھ کے اوپر سے این ایس اے کو ہٹاتی ہے تو بھی امرت پال سنگھ کو عدالتوں کے چکر کاٹنے پڑیں گے، کیونکہ امرت پال سنگھ کے خلاف پنجاب کے ضلع امرتسر کے اجنالہ تھانے میں غیر قانونی ہتھیاروں سے حملہ سمیت مختلف تھانوں میں تقریباً 12 مقدمات درج ہیں۔اتنا ہی نہیں آسام میں بھی ان کے خلاف مقدمہ درج ہے۔
