امت نیوز ڈیسک //
سری نگر: سرکاری ذرائع کے مطابق شمالی کشمیر کے ضلع کپوارہ میں ہفتے کو لائن آف کنٹرول (ایل او سی) کے قریب جھڑپ میں ایک فوجی جوان جاں بحق ہوا جبکہ میجر سمیت 5 اہلکار زخمی ہوئے ،جنہیں اسپتال منتقل کیا گیا ۔۔بتادیں کہ یہ انکائونٹر وزیر اعظم نریندر مودی کے کرگل میں کرگل وجے دیوس کے موقع پر اپنے خطاب میں پاکستان کو سخت وارننگ دینے کہ ہماری فوج پوری طاقت کے ساتھ دہشت گردی کو کچلے گی اور دشمن کو کرارا جواب دے گی، کے ایک دن بعد ہوا ہے۔
سرکاری ذرائع کے مطابق کپوارہ کے مژھل سیکٹر میں کمکاڑی پوسٹ کے نزدیک سیکورٹی فورسز اور دہشت گردوں کے درمیان گولیوں کا تبادلہ ہوا جس کے نتیجے میں 6اہلکات زخمی ہوئے ،جن میں سے ایک اہلکار زندگی کی جنگ ہار گیا۔خبر رساں ادارے اے این آئی نے دفاعی ترجمان کے حوالے سے یہ خبر دی ہے ۔دفاعی ترجمان نے بتایا کہ الرٹ فوجی اہلکاروں نے پاکستانی فوج کی بارڈر ایکشن ٹیم (بیٹ) کی کارروائی کو ناکام بنادیا ۔
دفاعی ذرائع نے اے این آئی کو بتایا کہ ہندوستانی فوج کے دستوں نے لائن آف کنٹرول پر پاکستانی بارڈر ایکشن ٹیم (بی اے ٹی) کے حملے کو ناکام بنا دیا۔حملے میں ملوث بی اے ٹی ٹیم پر شبہ ہے کہ ان کے ایس ایس جی کمانڈوز سمیت پاک فوج کے باقاعدہ دستے ہیں، جو دہشت گرد تنظیموں کے ساتھ مل کر کام کرتے ہیں۔
انہوں نے کہا کہ محاصرے کو سخت کرنے کے لئے فوج کی اضافی نفری کو جائے موقع کی طرف بھیج دیا گیا ہے تاکہ محاصرے میں پھنسے دہشت گردوں کو فرار ہونے کا کوئی موقع ہاتھ نہ آسکے۔
یہ گذشتہ 15 دنوں کے دوران کپوارہ میں ہونے والا چوتھا انکائونٹر ہے۔اس سے قبل ہونے والے تین تصادم آرائیوں میں 6 غیر ملکی ملی ٹنٹ ہلاک اور ایک جوان جاں بحق ہوا ہے۔فوجی سربراہ جنرل اوپنیدرا دویدی نے دو روز قبل کپوارہ میں ایل او سی ٌکے اگلے علاقوں کا دورہ کرکے سیکورٹی صورتحال کا جائزہ لیا۔
