امت نیوز ڈیسک //
شوپیاں، 19 مئی : جنوبی کشمیر کے شوپیاں ضلع کے کیلر علاقے میں اتوار کی شام ایک افسوسناک واقعہ پیش آیا جب تیز ہوا کے باعث ایک درخت خیمے پر گر گیا، جس کے نتیجے میں ایک کی موت اور ایک زخمی ہوا۔
ایک اہلکار نے خبر رساں ایجنسی جے کے این ایس کو بتایا کہ یہ واقعہ گدر چوان کے جنگلاتی علاقے میں اس وقت پیش آیا جب تیز ہواؤں کی وجہ سے ایک الپائن کا درخت خیمے پر گر گیا۔ اہلکار نے بتایا کہ ایک لڑکی، جس کی شناخت سوبی ریاض، بیٹی ریاض احمد بکروال کے نام سے ہوئی، موقع پر ہی دم توڑ گئی، جبکہ اس کے والد زخمی ہوئے۔ حکام نے واقعے کا نوٹس لے لیا ہے۔
آپ کو بتاتے چلیں کہ اتوار کی شام کشمیر کے کئی حصوں میں تیز بارش کے ساتھ تیز ہواؤں نے تباہی مچا دی، جس سے املاک کو نقصان پہنچا اور مختلف علاقوں میں بجلی منقطع ہوگئی۔ (جے کے این ایس)
