امت نیوز ڈیسک ///
سری نگر: وزیر تعلیم و صحت سکینہ یتو نے پیر کے روز سونہ مرگ میں ایک اعلیٰ سطحی میٹنگ کے دوران 3 جولائی سے شروع ہونے والی شری امرناتھ جی یاترا کے لئے کی جانے والی تیاریوں کا جائزہ لیا۔میٹنگ میں یاترا کے ہموار اور محفوظ انعقاد کو یقینی بنانے کے لیے متعدد محکموں کے افسران موجود تھے۔اس دوران یاتریوں کی سہولیات، رسد اور حفاظتی انتظامات پر زور دیا گیا۔
واضح رہے کہ امسال سالانہ یاترا 3 جولائی سے شروع ہوکر 9 اگست کو رکشا بندھن کے موقع پر اختتام پذیر ہوگی۔
لیفٹیننٹ گورنر منوج سنہا نے 12 جون کو پوتر گھپا میں ‘پراتھم پوجا’ انجام دی جس کے ساتھ سالانہ یاترا کا باقاعدہ آغاز ہوا۔انہوں نے عقیدت مندوں سے بڑی تعداد میں شری امرناتھ جی یاترا کرنے کی اپیل کی ہے۔ادھر حکومت اور شرائن بورڈ کی طرف سے یاترا کے احسن انعقاد کو یقینی بنانے کے لئے تمام تر تیاریوں کو حتمی شکل دی جا رہی ہے۔
قابل ذکر ہے کہ مرکزی وزارت داخلہ نے اس سال یاترا کے لیے 580 نیم فوجی کمپنیوں پر مشتمل تقریباً 42,000 اہلکاروں کی تعیناتی کا فیصلہ کیا ہے۔ ان میں سے 424 کمپنیاں جموں و کشمیر روانہ کی جا رہی ہیں، جب کہ باقی یونٹس، جن میں وہ 80 کمپنیاں بھی شامل ہیں جو ’آپریشن سندور‘ کے دوران پہلے ہی یو ٹی میں تعینات تھیں، کو یاترا کے راستے، سری نگر سمیت حساس علاقوں میں دوبارہ تعینات کیا جائے گا۔
