امت نیوز ڈیسک //
سرینگر، 28 ستمبر: بھارت کے الیکشن کمیشن (ای سی آئی) نے اعلان کیا ہے کہ جموں و کشمیر کے بڈگام اور نگروٹہ اسمبلی حلقوں کے ضمنی انتخابات بہار اسمبلی انتخابات کے ساتھ منعقد کیے جائیں گے۔
آج جاری ایک سرکاری بیان میں پول باڈی نے کہا کہ بڈگام اور نگروٹہ کے دو خالی نشستوں کے لیے مبصرین تعینات کر دیے گئے ہیں۔ اس اقدام سے واضح اشارہ مل رہا ہے کہ ان حلقوں میں انتخابات کے اعلان میں زیادہ وقت نہیں لگے گا۔
بیان کے مطابق:“بھارت کے الیکشن کمیشن نے فیصلہ کیا ہے کہ 470 افسران (320 آئی اے ایس، 60 آئی پی ایس، اور 90 آئی آر ایس/آئی آر اے ایس/آئی سی اے ایس وغیرہ سے) جو مختلف ریاستوں میں خدمات انجام دے رہے ہیں، کو بہار اسمبلی کے عام انتخابات اور ضمنی انتخابات جموں و کشمیر (بڈگام اور نگروٹہ)، راجستھان (انتا)، جھارکھنڈ (گھاتشیلا)، تلنگانہ (جوبلی ہلز)، پنجاب (ترن ترن)، میزورم (ڈمپا)، اور اڈیشہ (نوآپڑا) کے لیے جنرل، پولیس اور اخراجاتی مبصرین کے طور پر تعینات کیا جائے۔”
بہار اسمبلی انتخابات کے شیڈول کا اعلان اکتوبر کے دوسرے ہفتے میں متوقع ہے، جس سے قبل چیف الیکشن کمشنر گیانیش کمار کی سربراہی میں تین رکنی کمیشن ریاست کا دورہ کرے گا۔ اس سے پہلے 3 اکتوبر کو نئی دہلی میں جنرل، پولیس اور اخراجاتی مبصرین کے لیے بریفنگ ہوگی۔
سیاسی منظرنامے کے اعتبار سے بڈگام اور نگروٹہ نشستوں پر بالترتیب بی جے پی اور نیشنل کانفرنس (این سی) کو برتری حاصل ہے۔
