امت نیوز ڈیسک
سرینگر :کنسرنڈ سٹیزنز گروپ کے ایک وفد نے جس کی قیادت سابق مرکزی وزیر یشونت سنہا کر رہے تھے اور جس میں ایئر وائس مارشل (ریٹائرڈ) کپل کاک، سینئر صحافی بھارت بھوشن اور سماجی کارکن سشوبھا باروے شامل تھیں، میرواعظِ کشمیر ڈاکٹر مولوی محمد عمر فاروق سے ان کی رہائش گاہ نگین پر ملاقات کی۔
ملاقات کے دوران جموں و کشمیر کی مجموعی صورتحال اور عوامی اہمیت کے امور پر تبادلہ خیال کیا گیا۔ بات چیت میں اس امر پر بھی گفتگو ہوئی کہ مستقل بنیادوں پر روابط اور مکالمے کا عمل برقرار رکھنا، انسانی پہلووں بشمول سیاسی نظربندوں کی صورتحال پر توجہ دینااور عوامی مشکلات میں کمی لانے کے اقدامات نہایت ضروری ہیں۔
میرواعظ عمر فاروق نے وفد کی کشمیر سے متعلق مسلسل دلچسپی کی قدردانی کرتے ہوئے اس بات پر زور دیا کہ مکالمہ، باہمی فہم و فراست اور ہمدردی ہی امن و مفاہمت کو فروغ دینے کی کنجی ہیں۔
دونوں فریق اس بات پر متفق ہوئے کہ مسلسل رابطہ اور عوامی سطح پر پہنچ بڑھانا اعتماد سازی اور استحکام و امید کے ماحول کے قیام کے لیے نہایت اہم ہے۔
