امت نیوز ڈیسک //
جموں و کشمیر کے لیفٹیننٹ گورنر منوج سنہا نے اتوار کو جموں میں ایک اعلیٰ سطحی سیکیورٹی جائزہ اجلاس کی صدارت کی، جس میں یونین ٹیریٹری کی مجموعی صورتحال، لائن آف کنٹرول (ایل او سی) کے حالات اور ملی نیٹ ورکس کے خلاف جاری کارروائیوں کا تفصیلی جائزہ لیا گیا۔
ذرائع کے مطابق یہ میٹنگ صبح 11 بجے جموں کنونشن سینٹر میں منعقد ہوئی، جس میں فوج، جموں و کشمیر پولیس، سی آر پی ایف، خفیہ ایجنسیوں اور سول انتظامیہ کے اعلیٰ افسران نے شرکت کی۔
اجلاس میں گزشتہ ہفتے دہلی میں ہوئے دھماکے سمیت حالیہ سیکیورٹی واقعات کا جائزہ لیا گیا اور ان کے جے اینڈ کے پر ممکنہ اثرات پر تبادلہ خیال کیا گیا۔
ذرائع نے بتایا کہ اعلیٰ حکام نے لیفٹیننٹ گورنر کو موجودہ سیکیورٹی گرڈ، تازہ انٹیلی جنس اطلاعات اور اندرونی علاقوں کے ساتھ سرحدی پٹی میں کیے گئے اقدامات سے آگاہ کیا۔
میٹنگ میں ایل او سی کی تازہ صورتحال کا بھی جائزہ لیا گیا، جہاں متعلقہ ایجنسیوں نے دراندازی کی کوششوں، نگرانی کے نظام اور اگلے مورچوں پر تعینات دستوں کی تیاریوں کے حوالے سے بریفنگ دی۔
ذرائع کے مطابق ایل جی نے تمام سیکورٹی ایجنسیوں کے درمیان قریبی رابطہ برقرار رکھنے اور ایل او سی کے حساس علاقوں پر مسلسل نگرانی یقینی بنانے کی ہدایت دی۔
سردیوں کی تیاری بھی اجلاس کا اہم حصہ رہی، جس میں فورسز نے برف باری کے موسم کے پیش نظر رسد، ہائی آلٹیٹیوڈ پوسٹوں تک رسائی، رابطے اور نقل و حرکت کو برقرار رکھنے سے متعلق انتظامات پیش کیے۔ موسم کی خرابی کی صورت میں ہنگامی منصوبوں کا بھی جائزہ لیا گیا۔
لیفٹیننٹ گورنر کو ملی ٹینٹ گروپوں کے معاون ڈھانچوں کو توڑنے کے لیے جاری کارروائیوں کے بارے میں بھی تفصیلی طور پر بریف کیا گیا۔
