امت نیوز ڈیسک //
سرینگر، 29 نومبر :سری نگر ڈویلپمنٹ اتھارٹی نے شہر میں 200 دکانوں کی منہدمی سے متعلق چل رہی افواہوں کو بے بنیاد قرار دیتے ہوئے کہا ہے کہ اتھارٹی اس وقت صرف اُن دکانداروں اور بلڈنگ ہولڈرز سے معلومات جمع کر رہی ہے جنہوں نے مبینہ طور پر الاٹ شدہ تجارتی یونٹوں پر غیر مجاز توسیعات کی ہیں۔
ایس ڈی اے کے اعلیٰ عہدیداروں نے کشمیر نیوز آبزرور کو بتایا کہ کئی دکانداروں نے اُن جگہوں پر اضافی ڈھانچے تعمیر کیے ہیں جو انہیں کرایے پر فراہم کی گئی تھیں۔ عہدیدار کے مطابق اس معاملے پر اتھارٹی کو متعدد شکایات موصول ہوئی ہیں۔
انہوں نے واضح کیا کہ “200 دکانوں کو توڑنے کی جو افواہیں گردش کر رہی ہیں وہ بالکل غلط ہیں۔ ایسا کوئی انہدامی آپریشن پلان نہیں ہے۔”
عہدیدار نے مزید بتایا کہ متعدد دکانداروں کو نوٹس جاری کیے گئے ہیں جن میں انہیں الاٹمنٹ سے زیادہ تعمیرات کے حوالے سے اپنی وضاحت پیش کرنے کا کہا گیا ہے۔
انہوں نے کہا، “یہ ایس ڈی اے کی ملکیتی جگہیں ہیں، لہٰذا انہدام کا سوال ہی پیدا نہیں ہوتا۔ اس وقت کارروائی صرف تصدیق اور مکمل ڈیٹا جمع کرنے تک محدود ہے۔”
ایس ڈی اے دفتر کے مطابق نوٹسز کے جوابات ملنے کے بعد ہی آئندہ کارروائی کا فیصلہ کیا جائے گا۔ (کے این او)
