امت نیوز ڈیسک //
بارہمولہ، 19 دسمبر :شمالی کشمیر کے ضلع بارہمولہ کے رفیع آباد علاقے سے تعلق رکھنے والے ایک شخص کی پٹن میں پُراسرار حالات میں لاش برآمد ہونے کے بعد پولیس نے تحقیقات شروع کر دی ہیں۔
کے این او سے بات کرتے ہوئے ایک عہدیدار نے بتایا کہ متوفی، کھنموہ رفیع آباد کا رہائشی تھا اور پٹن کے گوشہ بگ گاؤں میں ایک شخص کے گھر کام کر رہا تھا، جہاں اس کی لاش مشکوک حالت میں ملی۔
متوفی کی شناخت جاوید احمد میر کے طور پر کی گئی ہے۔ اہلِ خانہ کا کہنا ہے کہ انہیں آج صبح موت کی اطلاع دی گئی، تاہم انہوں نے واقعے میں قتل کا شبہ ظاہر کرتے ہوئے مکمل اور شفاف تحقیقات کا مطالبہ کیا ہے۔ خاندان نے کہا، “موت کی اصل وجہ سامنے آنی چاہیے اور ہمیں انصاف فراہم کیا جائے۔”
ادھر پولیس کی ٹیم موقع پر پہنچ گئی ہے اور واقعے کی ہر پہلو سے جانچ کی جا رہی ہے تاکہ موت کی اصل وجہ معلوم کی جا سکے۔ — (کے این او)
