امت نیوز ڈیسک //
ضلع مجسٹریٹ اننت ناگ نے عوامی امن و امان برقرار رکھنے کے پیشِ نظر کوکرناگ کے رہائشی انور جان عرف انور پھامڈا کو جموں و کشمیر پبلک سیفٹی ایکٹ (PSA) 1978 کے تحت حراست میں لینے کے احکامات جاری کیے ہیں۔
سرکاری ذرائع کے مطابق یہ حکم سینئر سپرنٹنڈنٹ آف پولیس اننت ناگ کی جانب سے پیش کی گئی تفصیلی رپورٹ کا جائزہ لینے کے بعد صادر کیا گیا، جس کے بعد انور جان کو ضلع جیل بھدرواہ منتقل کر دیا گیا ہے۔
انور جان کا تعلق عوامی اتحاد پارٹی (AIP) کشمیر سے رہا ہے اور انہوں نے جموں و کشمیر اسمبلی انتخابات 2024 میں اسمبلی حلقہ 42-ایس ٹی کوکرناگ سے الیکشن لڑا تھا۔ انہیں تقریباً 7 ہزار ووٹ ملے تھے تاہم وہ تقریباً 11 ہزار ووٹوں کے فرق سے الیکشن ہار گئے تھے۔
ان کے خود جمع کردہ انتخابی حلف نامے کے مطابق انور جان کے خلاف مختلف پولیس تھانوں، جن میں لارنُو، پہلگام، سامبا، ناگروٹا، چنینی اور رام بن شامل ہیں، میں متعدد ایف آئی آرز درج ہیں۔ ان میں سے کئی مقدمات عدالتوں میں زیرِ سماعت ہیں جبکہ اب تک کسی بھی معاملے میں سزا ثابت نہیں ہوئی ہے۔
انتظامیہ کا کہنا ہے کہ پی ایس اے کے تحت یہ کارروائی ایک احتیاطی قدم کے طور پر کی گئی ہے تاکہ ضلع میں امن و امان اور عوامی سکون برقرار رکھا جا سکے۔
