امت نیوز ڈیسک //
جموں و کشمیر کے نائب وزیر اعلیٰ سریندر چودھری نے پیر کے روز الگ جموں ریاست کے مطالبے کی سخت مخالفت کرتے ہوئے کہا کہ کوئی بھی محبِ وطن شخص اس طرح کے مطالبے کی نہ حمایت کر سکتا ہے اور نہ ہی اسے اٹھا سکتا ہے۔
میڈیا سے بات کرتے ہوئے سریندر چودھری نے الزام عائد کیا کہ الگ جموں ریاست کا مطالبہ کرنے والے عناصر دراصل پاکستان کی خفیہ ایجنسی آئی ایس آئی کے ایجنٹ کے طور پر کام کر رہے ہیں اور پاکستان کے اس ایجنڈے کو آگے بڑھا رہے ہیں جس کا مقصد جموں و کشمیر کو تقسیم کرنا ہے۔
انہوں نے کہا کہ ایسے عناصر سچے ہندوستانی نہیں ہو سکتے کیونکہ وہ دشمن ملک کے ناپاک عزائم کی تکمیل میں لگے ہوئے ہیں۔ نائب وزیر اعلیٰ کا کہنا تھا کہ گزشتہ تین دہائیوں سے پاکستان کی سرپرستی میں چلنے والی دہشت گردی کا مقصد جموں و کشمیر کو تقسیم کرنا رہا ہے، اور اس میں لداخ کو بھی خطے سے الگ کرنے کی کوششیں شامل رہی ہیں۔
تاریخ کا حوالہ دیتے ہوئے سریندر چودھری نے کہا کہ جموں و کشمیر مہاراجہ گلاب سنگھ، مہاراجہ ہری سنگھ اور شیخ محمد عبداللہ کی سرزمین ہے، اور اس کی وحدت پر کوئی سمجھوتہ نہیں کیا جا سکتا۔
انہوں نے واضح کیا کہ نیشنل کانفرنس ہمیشہ جموں و کشمیر کی وحدت اور سالمیت کے حق میں کھڑی رہی ہے۔ نائب وزیر اعلیٰ نے کہا،
“ہم ہندوستانی ہیں اور آخری سانس تک ہندوستانی رہیں گے۔”
