(دہرادون) اتراکھنڈ اسپیشل ٹاسک فورس (ایس ٹی ایف) نے دہرادون کے پریم نگر اور سیلاکوئی پولیس اسٹیشن کے علاقے سے دو کشمیری طلباء کو حراست میں لیا ہے۔ دونوں طلبا سے ایک سنگین معاملے میں تفتیش کی جا رہی ہے۔ میڈیا خبروں کے مطابق کشمیر میں ایک پولیس اہلکار اور سیلز مین کے قتل سے متعلق دونوں سے پوچھ گچھ کی جارہی ہے۔ تاہم ایس ٹی ایف نے اس معاملے میں ابھی تک واضح طور پر کچھ بھی نہیں بتایا ہے اور نہ ہی اس کی تصدیق کی ہے۔ موصولہ ابتدائی معلومات کے مطابق ماضی قریب میں کشمیر میں ہلاک کیے گئے پولیس اہلکاروں اور سیلز مین کا لنک دہرادون سے بتایا جارہا ہے اور ان دونوں معاملے میں کشمیر کے طالب علموں کو حراست میں لیکر تفتیش جاری ہے۔ حراست میں لیے گئے دونوں کشمیری طلبا دہرادون کے سُدو والا اور سیلاکوئی میں پڑھتے ہیں۔ بتایا جاتا ہے کہ شک کی بنیاد پر اتراکھنڈ ایس ٹی ایف نے دونوں کشمیری طلباء کو پوچھ تاچھ کے لیے حراست میں لیا ہے۔ قابل ذکر بات ہے کہ دہرادون میں پہلے بھی کئی کشمیری طلبہ کو گرفتار کیا جا چکا ہے۔
