امت نیوز ڈیسک //
جموں و کشمیر پردیش کانگریس کمیٹی کے صدر وقار رسول وانی نے راجوری حملے کی سخت الفاظ میں مذمت کرتے ہوئے کہا کہ ملی ٹینسی کی لہراب جموں پہنچ گئی ہے۔انہوں نے بتایا کہ مرکزی سرکار جموں و کشمیر میں حالات بہتر ہونے کےدعوے کر رہی ہیں لیکن حقائق اس کے برعکس ہیں ۔ان باتوں کا اظہار موصوف نے جموں میں نامہ نگاروں سے بات چیت کےدوران کیا۔انہوں نے کہا کہ راجوری میں عام شہریوں کی ہلاکت ناقابل برداشت ہے۔اور اس کی جتنی بھی مذمت کی جائے کم ہے۔ انہوں نے کہا کہ جموں و کشمیر کی انتظامیہ اور مرکزی سرکار کے نئے کشمیرکے وعدے کا کیا ہوا۔اُن کے مطابق ملی ٹینسی اب جموں پہنچ گئی ہے اور سرکار صرف جھوٹے دعوے کر رہی ہیں۔پی سی سی چیف نے بتایا کہ راجوری میں شہری ہلاکتیں دراصل انٹیلی جنس کی ناکامی کا منہ بولتا ثبوت ہے۔ انہوں نے بتایا کہ ملی ٹینٹوں نے پہلے اتوار کی شام عام شہریوں پر بندوقوں کے دہانے کھولے اور پیر کی صبح اسی مقام پر آئی ای ڈی دھماکہ ہوا جو اس بات کی واضح دلیل ہے کہ یہ انٹیلی جنس کی ناکامی ہے۔وقار رسول وانی نے کہا کہ شہریوں پر فائر نگ کے بعد حملہ آور بچ نکلنے میں بھی کامیاب ہوئے ہیں۔انہوں نے مرکزی سرکار کی نکتہ چینی کرتے ہوئے کہا کہ پارلیمنٹ اجلاس کے دوران بھاجپا کے لیڈران کشمیر میں حالات بہتر ہونے کے دعوے کر رہے ہیں لیکن حقائق اس کے بر عکس ہیں ۔اُن کے مطابق جموں و کشمیر میں روز افزاں انسانی جانیں تلف ہو رہی ہیں، کشمیری پنڈت وادی سے بھاگ کر جموں منتقل ہو رہے ہیں۔ وقار رسول وانی نے بتایا کہ کانگریس وفد نے راجوری جانے کی کوشش کی لیکن سیکورٹی فورسز نے انہیں وہاں جانے نہیں دیا لیکن بھاجپا کے لیڈران کو محفوظ راہداری فراہم کی جارہی ہیں۔
