امت نیوز ڈیسک //
بارہمولہ:جموں وکشمیر کے شمالی ضلع بارہمولہ کے پلہالن پٹن میں دھمکی آمیز پوسٹر چسپاں کرنے کے الزام میں پولیس نے ایک نوجوان کو گرفتار کیا ہے۔
پولیس کے ایک ترجمان نے بتایا کہ جمعرات کے روز پولیس پوسٹ پلہالن کو اطلاع موصول ہوئی کہ تانترے پورہ پلہالن پٹن میں غیر مقامی شہریوں کو دھمکیاں دینے اور پہلگام میں انتظامیہ کی جانب سے شراب کی دکان کھولنے کے خلاف نام نہاد عسکریت پسند تنظیم ’لون ولف وورئیر “کی جانب سے دھمکی آمیز پوسٹر چسپاں کیا گیا ہے۔انہوں نے بتایا کہ اطلاع ملتے ہی پولیس اسٹیشن پٹن میں کیس درج کرکے تحقیقات شروع کی گئی۔
اُن کے مطابق پولیس پوسٹ پلہالن کی ایک ٹیم فوری طور پر جائے موقع پر پہنچی اور چسپاں کیے گئے پوسٹر اور شاہراہ پر مزید کئی دھمکی آمنیز پوسٹرس کو برآمد کرکے ضبط کیا گیا۔انہوں نے بتایا کہ پولیس نے کئی مشتبہ افراد کو پوچھ تاچھ کی خاطر پولیس اسٹیشن طلب کیا۔
موصوف ترجمان نے بتایا کہ ایس ڈی پی او پٹن کی نگرانی میں ایس ایچ او اور ڈ ی او پلہالن نے مشتبہ نوجوان الطاف احمد راتھر ولد غلام محمد راتھر ساکن تانترے پورہ پلہالن کی گرفتاری عمل میں لائی۔انہوں نے بتایا کہ دوران پوچھ گچھ گرفتار نوجوان نے اپنا جرم قبول کیا جبکہ پولیس نے جائے وقوع پر جو ثبوت و شواہد اکھٹا کیے اُن سے بھی یہ ثابت ہوا کہ گرفتار نوجوان نے ہی دھمکی آمیز پوسٹر چسپاں کیے تھے۔
پولیس کا کہنا ہے کہ مزید تحقیقات کے دوران معلوم ہوا ہے کہ مذکورہ نوجوان پاکستانی ملیٹینٹ ہینڈلرز کے ساتھ سوشل میڈیا سائٹوں کے ذریعے رابطے میں تھا اور اُن کے کہنے پر ہی نوجوان نے لوگوں میں خوف و دہشت کا ماحول پیدا کرنے کی خاطر دھمکی آمیز پوسٹر چسپاں کیے۔موصوف ترجمان نے بتایا کہ گرفتار نوجوان کی نشاندہی پر اُس کے رہائشی مکان پر چھاپہ ڈالا گیا اور وہاں سے مزید پوسٹرس اور موبائیل فون کو برآمد کرکے ضبط کیا گیا۔انہوں نے کہاکہ اس سلسلے تحقیقات کا دائرہ مزید وسیع کیا گیا ہے۔
(یو این آئی
